маориф
ТОҶИКИСТОН: 201 МЕДАЛ АЗ ОЛИМПИАДАҲОИ БАЙНАЛМИЛАЛӢ
Тавре аз маркази матбуоти Вазорати маориф ва илми ҷумҳурӣ хабар доданд, хонандагони Тоҷикистон аз аввали соли ҷорӣ то имрӯз дар 14 олимпиадаи байналмилалӣ, ки дар Қазоқистон, Ҳиндустон, Руминия, Русия, Малайзия, Булғористон, Беларус, Ветнам, Италия, Тоҷикистон ва ИМА баргузор шуданд, сазовори 201 медал (47 тилло, 71 нуқра ва 83 биринҷӣ) гардиданд.
Бахусус, дастовардҳои толибилмони навраси тоҷик дар олимпиадаҳое, ки дар шаҳри Кедахи Малайзия (моҳи апрел) ва пойтахти Федератсияи Русия - Москва (2 - 3 июн) доир шуданд, шоистаи таҳсинанд. Аз 7 Олимпиадаи байналмилалии наврасони ихтироъкор - «Malaysian International Inventors Olympiad» хонандагони Литсей - интернати президентӣ барои кӯдакони болаёқати Ҷумҳурии Тоҷикистон, Мактаби хусусии ба номи Абдураҳмони Ҷомии шаҳри Душанбе, Литсей барои кӯдакони болаёқати шаҳри Хуҷанд ва Мактаби байналмилалии президентӣ ба Ватан бо 13 медали тилло, 13 нуқра ва 8 биринҷӣ баргаштанд. Ба ҷуз ин, хонандагони Литсей - интернати президентӣ барои кӯдакони болаёқат соҳиби мукофоти махсуси ҳайати доварони олимпиада шуданд.
Дар Олимпиадаи байналмилалии арифметикаи зеҳнии шаҳри Москва бошад, тарбиятгирандагони Маркази инкишофи зеҳнии «Пифагор» - и шаҳри Хуҷанд байни ҳамсолони худ аз Русия, Қазоқистон ва Қирғизистон маҳорату дониши воло нишон дода, дар ҷамъбасти даставӣ бо гирифтани 5 ҷом ва 16 медали тилло сазовори мақоми аввал гардиданд. Боиси зикр аст, ки дар ин олимпиада хонандаи синфи 8 - и Литсейи № 1 - и ба номи академик Муҳаммад Осимӣ Ғайрат Усмонов дар зарфи 25 дақиқа 210 мисолро ҳал намуда, соҳиби унвони «Устоди арифметикаи зеҳнӣ» гардид.
Ҳамин тариқ, ин комёбиҳои беназири толибилмони тоҷик дар арсаи байналмилалӣ самараи сиёсати маорифпарваронаи Пешвои муаззами миллат муҳтарам Эмомалӣ Раҳмон буда, гувоҳи он аст, ки солҳои оянда низ насли наврас дар ин ҷода ба муваффақиятҳои аз ин ҳам бештар ноил гардида дар рушду нумӯи Ватани маҳбубамон саҳми бориз мегиранд.
Б. КАРИМ, “Ҷумҳурият”
Баёни ақида (0) Санаи нашр: 27.07.2018 №: 148 Мутолиа карданд: 2586
