туризм
СУҒД.
ҶУҒРОФИЯИ ВОРИДШАВИИ САЙЁҲОН ТАВСЕА МЕЁБАД
Тавре аз хадамоти матбуоти раиси вилояти Суғд иттилоъ доданд, аз мавзеъҳои сайёҳии вилоят дар шаш моҳи аввали соли ҷорӣ беш аз 370 ҳазор сайёҳи хориҷӣ дидан намудааст, ки аксари онҳоро шаҳрвандони Ӯзбекистон (303,3 ҳазор), Русия (39,3 ҳазор), Қирғизистон (23,5 ҳазор) ва Қазоқистон (3,6 ҳазор) ташкил медиҳанд.
Ба ҷуз ин, шумораи зиёди сайёҳони Туркманистон, Беларус, Озарбойҷон, Арманистон, Украина ва Молдова аз маконҳои таърихӣ, чашмаҳои шифобахшу истироҳатгоҳҳо ва табиати нотакрору мафтункунандаи вилояти Суғд баҳраманд гаштаанд.
Масъулин иброз медоранд, ки дар Соли рушди сайёҳӣ ва ҳунарҳои мардумӣ баланд бардоштани сатҳу сифати хизматрасонӣ ва таҷдиди инфрасохтори соҳа барои ҷалби бештари сайёҳони дохилию хориҷӣ мусоидат намуд. Имрӯз дар вилоят баҳри фароҳам овардани шароити мусоиди истироҳату фароғат ва сайругашт барои сайёҳон ва шиносоии онҳо бо мавзеъҳои таърихӣ ва бостоншиносӣ дар баробари мақомоти давлатӣ беш аз 20 ширкати сайёҳӣ самаранок фаъолият доранд. Баҳри истироҳату саёҳати меҳмонон ҳоло дар шаҳру ноҳияҳои вилоят 55 меҳмонхона, 13 осоишгоҳ, 26 осорхона, мавзеъҳои таърихиву фароғатӣ, минҷумла маҷмааи таърихию фарҳангии “Қалъаи Муғ”, осоишгоҳи “Баҳористон” ва маҷмааи хизматрасонии меҳмонхонаи байналмилалии “Парламент” бо тарҳи зебову замонавӣ дар соҳили Сирдарё, ки соли ҷорӣ мавриди баҳрабардорӣ қарор дода шуд, ҳамеша омодаи қабули сайёҳонанд.
Қобили таъкид аст, ки бо эълон гардидани Соли рушди сайёҳӣ ва ҳунарҳои мардумӣ, боз ҳам беҳтар шудани сатҳи хизматрасонии ширкатҳои сайёҳӣ ва муаррифии шоистаи имкониятҳои туристии Тоҷикистон ҷуғрофияи воридшавии сайёҳони хориҷӣ ба қаламрави кишвар боз ҳам тавсеа ёфт.
Б. КАРИМ, “Ҷумҳурият”
Баёни ақида (0) Санаи нашр: 31.07.2018 №: 150 Мутолиа карданд: 953
