ҳуқуқ
ВМКБ.САТҲИ ҶИНОЯТКОРӢ КОҲИШ ЁФТААСТ
Дар нимсолаи аввали соли равон дар Вилояти Мухтори Кӯҳистони Бадахшон нисбат ба ҳамин давраи соли гузашта 24 ҷиноят камтар сабт шудааст. Вазъи ошкорсозии ҷиноятҳо низ беҳбуд ёфта, аз 18 ҷинояти дар ин давра содиршуда 14 ҳолат ошкор ва бо фикри айбдорӣ ба суд ирсол гардид. Аз 115 нафар шахси аз солҳои пеш дар кофтуков қарор дошта, 18 нафар дастгир шуд.
Дар ин бора Мансур Бухоризода, сардори раёсати Вазорати корҳои дохилии Ҷумҳурии Тоҷикистон дар ВМКБ, иттилоъ дода, нисбат ба солҳои пеш коҳиш ёфтани сатҳи ҷинояткорӣ ва афзоиши кушодашавии ҷиноятҳоро дар беҳтар гаштани ҳамкории милитсия бо мардум маънидод кард.
Ба гуфтаи ӯ, аввали соли равон дар маҷлиси Ҳукумати кишвар Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон аз афзоиши ҷинояткорӣ дар ВМКБ изҳори нигаронӣ карда, дастур доданд, ки мақомоти ҳифзи ҳуқуқ ҳамкориашонро дар самти коҳиш додани сатҳи ҷинояткорӣ бо мардум густариш диҳанд. Бинобар ин, раёсат ва шуъбаҳои он дар шаҳру ноҳияҳои вилоят тамоми қувваю дониш ва малакаи касбиашонро ба ин самт равона намуда, ба муваффақият ноил шуда истодаанд.
Дар ин давра аз ҷониби кормандони милитсия се гурӯҳи муташаккили ҷинояткор, ки дар вилоят ва берун аз он ба қочоқи маводи мухаддир, силоҳ ва сангҳои қиматбаҳо машғул буданд, дастгир шуда, аз онҳо зиёда аз 162 килограмм маводи мухаддир, 2 килограмм сангҳои қиматбаҳо бо арзиши калон мусодира гардид. Ҳамчунин, аз аҳолӣ 69 адад силоҳи ғайриқонунӣ гирифта шуд.
Дар вилоят ба корҳои фаҳмондадиҳӣ, пешгирии ҷинояткорӣ, бахусус байни ҷавонон таваҷҷуҳи бештар равона гардида, ба тарғиби Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд дар Ҷумҳурии Тоҷикистон» диққати бештар дода мешавад. Дар муассисаҳои таълимӣ ва маҳалҳо бо волидайн ва омӯзгорону хонандагони синфҳои болоӣ дар ҳамкорӣ бо масъулон 428 суҳбату вохӯриҳо ташкил шуданд. Дар нимсолаи аввал бинобар вайрон кардани талаботи қонуни мазкур нисбат ба 280 нафар падару модар ва роҳбарони муассисаҳои таълимӣ протоколи ҳуқуқвайронкунии маъмурӣ тартиб дода шуда, онҳо ба маблағи 5 ҳазор сомонӣ ҷарима гардиданд. Умуман, дар ин давра дар вилоят қариб ҳафт ҳазор қонунвайронкунии маъмурӣ аз ҷониби кормандони милитсия ба қайд гирифта шуда, аз ин ҳисоб 128 ҳазор сомонӣ ҷарима ситонда шуд.
Раҳмони ГУЛЗОР, “Ҷумҳурият”
Баёни ақида (0) Санаи нашр: 06.08.2018 №: 154 Мутолиа карданд: 992
