ҳуқуқ
ХИЁНАТИ НАҲЗАТ ОШКОРТАР ШУД
Вақт довари ҳақиқиест, ки бо мурури замон ҳақро аз ботил ҷудо мекунад, ҳамаи асрор хоҳ нек бошад ё бад ошкор мешавад. Одамони бадтинат, ки бо сад ҳилаву найранг ба Ватан, миллат ва мазҳаби худ хиёнат мекунанд, мувофиқи адолати Илоҳӣ дар назди мардум шарманда мешаванд.
Шахсоне, ки дар давоми 27 соли Истиқлолияти давлатӣ ба Ватан ва миллат хиёнат карданд, мардумро ноором сохтанд, хуни ноҳақ рехтанд, сирру асрорашон аз дохили худ ошкор шуд. Далели раднопазир дар ин маврид изҳороти ахири яке аз муассисони Ҳизби наҳзати исломӣ Аёмиддин Сатторов мебошад. Номбурда дар як намоиши телевизионӣ ё филми ҳуҷҷатие таҳти унвони «Бозгашт аз ҷаҳаннам» аз ҳаёти чандинсолаи худ, ки ҳамроҳи саркардагони ТТЭ ҲНИ ва охундҳои Ҷумҳурии Исломии Эрон ба сар бурдааст, нақл карда, бори дигар кӣ будани муассисони наҳзат ва ҳадаф аз таъсиси онро окшор намуд.
Баъд аз тамошои ин филм ва афсӯсу надоматҳои Аёмиддин Сатторов тамоми мардуми Тоҷикистон, аз ҷумла ходимони дини масҷиди ҷомеи марказии Шайх Маслиҳатдини шаҳри Хуҷанд аз нақшаҳои Кабирӣ ва созмондеҳони ҳизбаш огоҳтар шуданд. Бори дигар маълум шуд, ки ҳадафи онҳо ба дини ислом хидмат кардан не, балки аз номи дин суистифода карда, маблағ ба даст овардан ва бо роҳи хиёнат ба халқу миллати худ хизмат кардан ба хоҷагону гумроҳ сохтани мардум аст. Вале, онҳо ин ҳақиқатро бояд қабул дошта бошанд, ки халқи тоҷик мисли солҳои 90 - уми асри гузашта ноогоҳу фирефта нест ва кулли мардум, аз ҷумла мо - ходимони дин ба ин гурӯҳи хиёнткор нафрати зиёд дорем.
Ҳоҷӣ Ҳусайн МӮСОЗОДА, ходими динӣ
Баёни ақида (0) Санаи нашр: 30.08.2018 №: 171 Мутолиа карданд: 1039
