номаҳо
БО СИПОС ЯК ДАРХОСТ
Аз 1 сентябри соли равон боло бурдани нафақаи синнусолӣ бо Фармони Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо – нафақагиронро басо шод намуд. Албатта, Сарвари давлат нисбат ба мо пайваста ғамхорӣ зоҳир мекунанд.
Мо медонем, ки бо боло рафтани имкониятҳои иқтисодӣ сатҳи зиндагиамон боз ҳам беҳтар мегардад. Дар қиёс ба солҳои пештар ҳаҷми нафақаамон афзудааст. Зарур мебошад, ки мо ин ҳамаро ба дидаи эътибор бингарем ва шукр карданро аз ёд набарорем.
Ҳамеша даст ба дуо мебардорем, ки ин сулҳу салоҳамон пойдор бошаду истиқлоламон ҷовидон.
Мавриди зикр аст, ки аз синну солам бигӯям. Ҳаштоду ҳаштсолаам. Чи рӯзҳову солҳои вазнинро бо ҳама мушкилоташ пушти сар кардаам. Дар иншооту сохтмонҳои муҳими кишвар саҳми чашмрас гирифтаам. Вале баробари онҳое нафақа мегирам, ки нисбатан ҷавонанду то ин ҳадд собиқаи корӣ надоранд. Хуб мешуд, ҳар шахс вобаста ба заҳматаш нафақа гирад, аммо чунин нест. Агар бо таваҷҷуҳи махсус барои ҳалли ин масъала тадбирҳои зарурӣ андешида мешуданд, бештар шоду мамнун мегардидем. Охир, шумораи мо, хосса нафароне, ки дар иншооту сохтмонҳои муҳими кишвар фаъолият доштанд ва синну солашон аз ҳаштод гузаштааст, зиёд нест. Инчунин, гурӯҳе аз мо ба пули бештари нафақа ниёзманданд, то дар даврони пирӣ беҳтару хубтар зиндагӣ бикунанд.
Шариф ҲАЛИМОВ,
шаҳри Ҳисор, Ҷамоати деҳоти
Хонақоҳи Кӯҳӣ, деҳаи Латтахорак
Баёни ақида (0) Санаи нашр: 30.08.2018 №: 171 Мутолиа карданд: 1259
