барқияҳо
Барқияҳо ба унвони Президенти Тоҷикистон
Муроҷиати Президенти Ҷумҳурии Тоҷикистон Эмомалӣ Раҳмон ба мардуми кишвар баҳри саҳмгузорӣ дар бунёди Нерӯгоҳи барқи обии Роғун аз ҷониби тамоми табақаҳои шаҳрвандон, аз ҷумла тоҷикону тоҷикистониёни бурунмарзӣ низ мавриди ҳамовозию дастгирӣ қарор мегирад. Дар ин бора номаю барқияҳои зиёд ба номи Сардори давлат Эмомалӣ Раҳмон ворид мегарданд.
Номаҳои густурдаи ҳамовозӣ, аз ҷумла аз номи ҷамъиятҳои тоҷикону тоҷикистониёни муқими минтақаҳои Екатеринбург, Челябинск, Красноярск, Новосибирск, Иркутск ва Тюмени Федератсияи Русия ворид шудаанд.
Дар ин номаҳо ташаббуси Президенти мамлакат Эмомалӣ Раҳмон оид ба «ҷабҳаи заҳмати созанда ба хотири ободии Ватан» эълон гаштани майдони сохтмони Нерӯгоҳи барқи обии Роғун мавриди ҳамовозӣ қарор гирифтааст.
Дар номаҳо таъкид мегардад, ки баробари омода гаштани саҳмияҳои Нерӯгоҳи барқи обии Роғун, тоҷикону тоҷикистониёни муқими минтақаҳои номбурдаи Русия, аз ҷумла соҳибкорону тоҷирони соҳибнуфуз омодаанд аз онҳо харидорӣ намоянд.
Бо ҳисси баланди ифтихори ватандорӣ зикр мегардад, ки бо харидорӣ кардани саҳмияҳои нерӯгоҳи Роғун ҳар як шаҳрванд ҳам дар ободонии Ватани азизи худ саҳмгузор мешавад ва ҳам оянда аз он фоидаи хуби моддӣ ба даст меорад.
Баёни ақида (0) Санаи нашр: №: Мутолиа карданд: 5514
