мулоқотҳо
ПЕШВОИ МИЛЛАТ НУРСУЛТОН НАЗАРБОЕВРО БА ҲУЗУР ПАЗИРУФТАНД
27 сентябр дар Бӯстонсарои Ҳукумати Ҷумҳурии Тоҷикистон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи ҷаласаи Шӯрои сарони давлатҳои аъзои Иттиҳоди Давлатҳои Мустақил бо Президенти Ҷумҳурии Қазоқистон Нурсултон Назарбоев мулоқот карданд.
Сарвари давлат Эмомалӣ Раҳмон Нурсултон Назарбоевро ба Тоҷикистон хайрамақдам гуфта, таъкид доштанд, ки Қазоқистон имрӯз яке аз шарикони асосии Тоҷикистон мебошад ва мо барои идомаи муколамаи созандаи шарикии стратегӣ манфиатдорем.
Ҷонибҳо аз сатҳи ҳамкорию ҳамгироии давлатҳо дар чаҳорчӯбаи Иттиҳоди Давлатҳои Мустақил изҳори қаноат карда, таъкид доштанд, ки натиҷаҳои ҷаласаи Шӯро дар таҳкими минбаъдаи ҳамкории самарабахши кишварҳо омили таконбахш хоҳад гардид.
Ҳамкорӣ бо ин кишвари дӯст дар сиёсати хориҷии Тоҷикистон мақоми хоса дорад ва Қазоқистон дар байни шарикони тиҷоратӣ аз рӯи ҳаҷми гардиши мол ба ҷойи дуюм баромад.
Фаъолияти пурсамари Комиссияи байни-ҳукуматӣ оид ба ҳамкории тиҷоратию иқтисодӣ ва имзои Созишнома оид ба таъсиси Шӯрои соҳибкорӣ дар татбиқи мувофиқаҳои бадастомада ва санадҳои имзошуда назаррас маънидод гардид.
Рушди ҳамкорӣ дар самти ҷалби сармояи қазоқистонӣ, истифодаи самараноки захираҳои обию энергетикӣ, таҳкими робитаҳо дар соҳаҳои иқтисодӣ, фарҳангӣ - гуманитарӣ, маориф, таъсиси квотаҳо барои донишҷӯёни ду кишвар аз самтҳои афзалиятноки муносибатҳо арзёбӣ шуд.
Ҷонибҳо зимни мулоқот, ҳамчунин, масъалаҳои мубрами ҷомеаи ҷаҳонӣ, пешгирӣ ва муборизаи муштарак бо таҳдиду хатарҳо, аз қабили мубориза бо терроризм, экстремизм, радикализми динию сиёсӣ, гардиши ғайриқонунии маводи нашъаовар ва дигар шаклҳои ҷинояткории трансмиллии муташаккилро баррасӣ карданд.
Баёни ақида (0) Санаи нашр: 28.09.2018 №: 190-191 Мутолиа карданд: 1038
