порлумон
СОЗМОНИ ҲАМКОРИИ ШАНХАЙ. РОҲБАРИИ СОХТОРИ МИНТАҚАВИИ ЗИДДИТЕРРОРИСТӢ БА ТОҶИКИСТОН МЕГУЗАРАД
20 январи соли 2016 Кумитаи иҷроияи Сохтори минтақавии зиддитеррористӣ Ҳизби наҳзати исломиро ба рӯйхати ташкилотҳои террористии СҲШ, ҷудоихоҳ ва ифротгаро, ки фаъолияташон дар ҳудуди давлатҳои аъзои созмон манъ шудааст, дохил намуд. Ҳамчунин, Шӯрои сохтори минтақавии зиддитеррористӣ бо қарори худ таҳти № 473 аз 17 сентябри соли 2017 ахбороти ҷониби Ҷумҳурии Тоҷикистонро нисбат ба ташкилоти террористӣ – экстремистии Ҳизби наҳзати ислом ба инобат гирифта, ба Кумитаи иҷроияи сохтор дастур дод, ки дар якҷоягӣ бо мақомоти салоҳиятдори давлатҳои аъзои Созмони ҳамкории Шанхай баҳри пешгирӣ кардани фаъолияти ин ташкилот дар қаламрави давлатҳои аъзои соз-мон ҳамкорӣ намояд.
Ин нукта дар ҷаласаи якуми иҷлосияи панҷуми Маҷлиси намояндагон аз ҷониби Мансурҷон Умаров, муовини якуми раиси Кумитаи давлатии амнияти миллии Ҷумҳурии Тоҷикистон, зимни баррасии Протокол дар бораи ворид намудани тағйирот ба Созишномаи байни давлатҳои аъзои Созмони ҳамкории Шанхай оид ба Сохтори минтақавии зиддитеррористӣ аз 7 июни соли 2002 ба вакилони Маҷлиси намояндагон ироа гардид.
Протоколи мазкур 16 августи соли 2007 дар шаҳри Бишкек ба имзо расидааст. Он тартиби таъйин ва аз вазифа озод намудани директори Кумитаи иҷроияи Сохтори минтақавии зиддитеррористии Созмони ҳамкории Шанхай ва муовинони онро ба танзим дароварда, забонҳои расмӣ ва кории ин сохторро муайян месозад. Сохтори минтақавии зиддитеррористии СҲШ 7 июни соли 2002 ба мақсади дастгирии сулҳу суботи байналмилалӣ, амният ва густариши ҳамкориҳои давлатии аъзои созмон дар самти мубориза бар зидди терроризм, ҷудоихоҳӣ ва ифротгароӣ таъсис дода шудааст. Сохтори мазкур мақомоти доимоамалкунандаи Созмони ҳамкории Шанхай буда, бо ҳамоҳангсозии фаъолияти мақомоти салоҳиятдори давлатҳои аъзои созмон дар мубориза бар зидди терроризм мусоидат менамояд.
Вазифаи асосии сохтор аз коркарди пешниҳоди тавсияҳо оид ба рушди ҳамкориҳо, мусоидат ба мақомоти салоҳиятдори аъзо дар мубориза бар зидди терроризм, ҷудоихоҳӣ ва ифротгароӣ, аз ҷумла дар гузарондани машқҳои фармондеҳии ситоди зиддитеррористӣ, оперативӣ, тактикӣ ва чорабиниҳои фаъоли ҷустуҷӯӣ, инчунин, дар амалӣ намудани ҷустуҷӯи ашхосе, ки дар кофтукови байналмилалӣ қарор доранд, таъсиси махзани иттилоотӣ дар бораи ташкилоту созмонҳои террористӣ - экстремистӣ ва шахсони алоқаманд ба онҳо ва ғайра мебошанд.
Мансурҷон Умаров зикр кард, ки ин сохтори минтақавии зиддитеррористӣ дар давоми 16 соли фаъолияти худ ба яке аз бонуфузтарин ташкилотҳои минтақавии бо терроризм муборизабаранда табдил ёфтааст, ки инро созмонҳои байналмилалӣ эътироф карда, бо он ҳамкорӣ менамоянд.
Мансурҷон Умаров тазаккур дод, ки мутобиқи қарори Шӯрои давлатҳои аъзои Созмони ҳамкории Шанхай солҳои 2019 - 2021 вазифаи директори Кумитаи иҷроияи Сохтори минтақавии зиддитеррористии Созмони ҳамкории Шанхай аз Федератсияи Русия ба Ҷумҳурии Тоҷикистон мегузарад. Мавсуф иброз дошт, ки қаблан забони кории сохтори мазкур забони русӣ буд. Ҳоло забони хитоӣ низ забони расмӣ ва корӣ эътироф шудааст.
Мунаввари САФАР, «Ҷумҳурият»
Баёни ақида (0) Санаи нашр: 03.10.2018 №: 194 Мутолиа карданд: 1830
