сафарҳо
ПЕШВОИ МИЛЛАТ ДАР КИОТО
(Идомаи сафари расмӣ)
3 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз шаҳри Хиросима ба музофоти Киото ташриф оварданд.
Дар бӯстонсарои ҳукуматӣ маросими пазироии расмии Пешвои миллат муҳтарам Эмомалӣ Раҳмон аз ҷониби волии музофоти Киото Такатоши Нишиваки ва раиси шаҳри Киото Дайсаку Кадокава доир гардид.
Дар сухани шодбошии худ Сарвари давлати мо сатҳи муносибатҳои Тоҷикистону Японияро баланд арзёбӣ намуда, аз ҷараёни рушду тавсеаи бемайлони онҳо изҳори қаноатмандӣ карданд.
Баъди истиқболи самимии намо-яндагони воломақоми ҳукумати музофот ва шаҳри Киото ташрифи расмии Президенти мамлакат муҳтарам Эмомалӣ Раҳмон дар ин шаҳри қадима аз боздиди Қалъаи Ниҷоҷо оғоз шуд.
Дар ин ҷо Сарвари давлат муҳтарам Эмомалӣ Раҳмон бештар ба парвариши боғҳои дарахтони мевадиҳандаю сояафкан таваҷҷуҳ зоҳир намуданд.
Дар Киотои қадим 17 макони таърихӣ мавҷуд аст ва Қалъаи Ниҷоҷо дар байни онҳо мақоми хоса дошта, ба феҳристи Мероси ҷаҳонии ЮНЕСКО шомил гардидааст. Асосгузори Қалъаи Ниҷоҷо Токугава Иэясу буда, бунёди он соли 1601 оғоз гардида, соли 1626 ба анҷом мерасад. Майдони умумии қалъа 275 ҳазор метри мураббаъро ташкил медиҳад ва танҳо дар масоҳати 8 ҳазор метри мураббаъ биноҳои гуногун сохта шудааст. Ҳудуди қалъа, асосан, аз иморатҳои гуногуни таърихӣ ва боғҳо иборат мебошад. Дар маркази қалъа Қасри Ниномару қомат меафрозад. Қалъаи Ниҷоҷо ҳамчун қароргоҳи императори Киото бунёд шуда буд. Худи қасри император бошад, дар қисми шимолу шарқии қалъа ҷойгир аст.
Соли 1939 Қалъаи Ниҷоҷо ба макони сайру саёҳат табдил дода шуд. Дар ҳудуди қалъа якчанд боғ, дарахтзори олу ва олучаҳои японӣ мавҷуд мебошад. Боғи Ниномаруро меъмор ва усто Кобори Эншу бунёд менамояд. Дар боғ, ҳамчунин, як ҷӯйбори калон мавҷуд буда, бо сангҳои гуногун ороиш дода шудааст.
Баёни ақида (0) Санаи нашр: 04.10.2018 №: 195 Мутолиа карданд: 4011
