ҳуқуқ
ҶИНОЯТ ва ҶАЗО
КОРРУПСИЯ
Кӯшиши заминфурӯшӣ боз як мансабдорро ноком кард
Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар ноҳияи Носири Хусрави вилояти Хатлон як ҳолати коррупсионии вобаста ба заминро ошкор намуда, шахси ришваситонро боздошт карданд.
Тибқи иттилои дафтари матбуоти агентӣ, як шаҳрванд ба ин ниҳод бо ариза муроҷиат намуда, гуфтааст, ки сардори шуъбаи агентии суғуртаи иҷтимоӣ ва нафақа дар ноҳияи Носири Хусрав Шарифхон Мадалиев барои ҷудо намудани 0,10 гектар қитъаи замини наздиҳавлигӣ 2000 доллари амрикоӣ талаб кардааст.
Дар пайи муроҷиати шаҳрванд кормандони агентӣ дар натиҷаи гузарондани чорабиниҳои фаврӣ - тафтишотӣ 4 сентябри соли ҷорӣ Шарифхон Мадалиевро ҳангоми аз шаҳрванд Панҷӣ Тилабов гирифтани 2000 доллари амрикоӣ дар ноҳияи Носири Хусрав дастгир намуданд.
Вобаста ба ин ҳолат, нисбат ба Шарифхон Мадалиев бо моддаи 247 қисми 4 банди “б”- и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишоти пешакӣ идома дорад.
ҚАЛЛОБӢ
ё боздошти мардумфиребон
Кормандони милитсия дар пайи чорабиниҳои фаврӣ - ҷустуҷӯӣ як марди 48 - сола, сокини шаҳри Турсунзодаро боздошт намуданд, ки дар ҳамдастӣ бо як шарикаш даст ба қаллобӣ задааст.
Бино ба иттилои сомонаи ВКД, ин афрод ҳангоми дар шаҳри Бохтар қарор доштанашон бо роҳи фиреб ба боварии зани 58 – сола, сокини шаҳри Душанбе, даромада, аз ӯ 40000 доллари амрикоӣ ва 30000 сомонӣ гирифта, то ҳол барнагардондаанд.
Дар ин робита, нисбат ба гумонбарони қаллобӣ парвандаи ҷиноятӣ оғоз гардида, тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 10.10.2018 №: 200 Мутолиа карданд: 887
