ҳуқуқ
ВМКБ. МУБОРИЗА АЛАЙҲИ ГАРДИШИ ҒАЙРИҚОНУНИИ МАВОДИ МУХАДДИР ПУРЗӮР МЕШАВАД
Дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки 15 сентябри соли равон дар мулоқот бо фаъолони Вилояти Мухтори Кӯҳистони Бадахшон ба миён гузошта шуданд, кормандони раёсати Агентии назорати маводи нашъаовари назди Президенти Ҷумҳурии Тоҷикистон дар ВМКБ ҷиҳати пешгирии муомилоти ғайриқонунии маводи нашъаовар чораҳои муассирро ба роҳ монданд.
Тавре аз дафтари матбуоти агентӣ ба рӯзномаи «Ҷумҳурият» иттилоъ доданд, баъд аз мулоқоти Президенти мамлакат бо сокинони ВМКБ ва нигаронии амиқи Сарвари давлат аз афзоиши амалҳои ҷинояткорӣ, бахусус гардиши ғайриқонунии маводи мухаддир, кормандони раёсати агентӣ дар вилоят фаъолияташонро боз ҳам пурзӯр карда, аз 16 сентябри соли равон то кунун 3 нуқтаи фурӯши чаканаи маводи мухаддирро ошкор намуданд. Зимнан, нашъаҷаллобон Лангаршо Қурбоншоев, Матлубшо Додалиев ва Искандар Мамадризохонов бо ҷурми фурӯши чаканаи маводи нашъаовар боздошт ва нисбаташон парвандаи ҷиноятӣ оғоз шудааст.
Маҷмӯи чорабиниҳо пеш аз ҳама, ба таблиғи тарзи ҳаёти солим ва баланд бардоштани маълумотнокии аҳолӣ дар бораи зарари маводи мухаддир равона шудаанд. Раёсат пешгирии нашъамандиро дар байни аҳолӣ вазифаи асосии фаъолияти худ дар соҳаи коҳиши талабот ба маводи нашъаовар мешуморад.
Аз ҳисоби кормандони агентӣ ба шаҳри Хоруғ як гурӯҳи корӣ сафарбар шуда, якҷо бо намояндагони дигар сохторҳои қудратӣ дар байни аҳолӣ суҳбату вохӯриҳо анҷом дод. Аз ҷумла, чунин як вохӯрӣ 10 октябри соли 2018 дар маҷлисгоҳи мақомоти иҷроияи маҳаллии ҳокимияти давлатии шаҳри Хоруғ бо намояндагон ва кормандони соҳаҳои маориф, тандурустӣ, ҷавонон, занон, донишҷӯён ва хонандагони муассисаҳои таҳсилоти миёнаи умумӣ баргузор шуд. Дар вохӯрӣ, ки бо ҳузури муовини директори агентӣ Муртазо Ҳайдарзода ҷараён гирифт, пешгирии хатарҳои таҳдидкунандаи ҷомеаи ҷаҳонӣ, аз қабили гардиши ғайриқонунии маводи мухаддир, шомилшавии ҷавонон ба ҳизбу ҳаракатҳои тундрав, убури ғайриқонунии сарҳад, ғайриқонунӣ нигоҳ доштани яроқ ва истифодаи он дар байни аҳолӣ, баланд бардоштани масъулияти падару модар дар тарбияи фарзандон дар меҳвари гуфтугӯ қарор гирифтанд.
Сафаргул АЛИМОВА,
«Ҷумҳурият»
Баёни ақида (0) Санаи нашр: 17.10.2018 №: 203 Мутолиа карданд: 874
