фарҳанг
НАМОИШГОҲИ ҲАШТУМИ БАЙНАЛМИЛАЛИИ. "КИТОБИ ДУШАНБЕ"
Китоб як рукни муҳими тамаддуни башарӣ ва ҷузъи ҷудонопазири зиндагии инсон аст. Аз ин ҷост, ки мардуми олам бо арзи эҳтиром китобро дар хазинаҳои миллии хеш нигоҳдорӣ мекунанд, то наслҳои имрӯза ва оянда аз он барои рушди камолоти маънавии худ истифода баранд. Дар ин раванд, мардуми фарҳангпарвари тоҷик дар эҷоди китобу китобхона аз пешрафтатарини миллатҳо ба шумор меравад. Ин нукта зимни кушодашавии Намоишгоҳи ҳаштуми байналмилалии «Китоби Душанбе», ки дар Китобхонаи давлатии бачагонаи ҷумҳуриявии ба номи Мирсаид Миршакар баргузор гашт, таъкид шуд.
Ҳадаф аз намоиш таҳкими ҳамкориҳои муассисаҳои интишории ватанӣ, баланд бардоштани сифату самарабахшии фаъолияти ноширӣ ва беҳтар намудани робитаи байни ноширону иттиҳодияҳои савдои китоб арзёбӣ гардид.
Шамсиддин Орумбекзода, вазири фарҳанг, дар ифтитоҳи ҳамоиш, аз ҷумла гуфт: «Дар замони соҳибистиқлолӣ Ҳукумати кишвар анъанаи китобдориву китобхониро аз самтҳои асосии сиёсати фарҳангӣ қарор дода, дар ин ҷода як қатор корҳои мушаххасро анҷом дод. Бунёди биноҳои нав ва таҷдиди китобхонаҳо дар шаҳру навоҳӣ, ҳамасола гузарондани фестивалу озмунҳои ҷумҳуриявии «Ҳафтаи китоби кӯдакону наврасони Тоҷикистон», «Китобдор, китобхона ва китобхонаи шахсии сол», «Ҳамнишине беҳ аз китоб махоҳ» аз ҷумлаи онҳост. Дар ин росто ҳамасола баргузор намудани намоиши «Китоби Душанбе» низ барои ҷалби наврасон ба хонишу донишандӯзӣ василаи судманд ба шумор меравад».
Дар намоиш намояндагони кишварҳои Русия, Ӯзбекистон, Ҳиндустон, Туркия, Афғонистон, Фаронса, Амрико ва нашриётҳои ватаниву хориҷӣ наздики 25000 адабиёти тозанашрро пешкаши дӯстдорони китоб намуданд. Намоишгоҳи байналмилалии «Китоби Душанбе» то 20 - уми октябр идома ёфта, дар доираи он чорабиниҳои гуногун, аз қабили конфронс, мизи гирд, рӯнамоии китобҳои тозанашр баргузор хоҳанд шуд.
Фарзона ФАЙЗАЛӢ, «Ҷумҳурият»
Баёни ақида (0) Санаи нашр: 19.10.2018 №: 204 Мутолиа карданд: 799
