ҳуқуқ
МАРЗБОНӢ. АЗ ДАРГИРИҲО ТО МУСОДИРАИ БЕШ АЗ 1350 КИЛОГРАММ МАВОДИ МУХАДДИР
Марзбонони тоҷик дар зарфи 9 моҳи соли ҷорӣ чанд ҳолати убури ғайриқонунии марзи давлатӣ ва кӯшиши интиқоли маводи мухаддирро ошкор ва пешгирӣ намуданд. Дар ин давра бо қочоқбарон 20 маротиба даргирии мусаллаҳона ба амал омада, дар натиҷа 11 нафар қочоқчӣ безарар ва 32 нафар боздошт гардид.
Дар ин бора зимни ҷаласаи ҷамъбастии фаъолияти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар нуҳ моҳи соли ҷорӣ гузориш дода шуд. Бино ба иттилои Муҳаммад Улуғхоҷаев, роҳбари маркази матбуоти Қӯшунҳои сарҳадӣ, марзбонон дар ин давра, ҳамчунин, 56 ҳолати кӯшиши убури ғайриқонунии марзро пешгирӣ карданд.
Дар натиҷаи 53 амалиёти вижае, ки ҷузъу томҳои Қӯшунҳои сарҳадӣ дар ҳамдастӣ бо дигар мақомоти қудратии кишвар анҷом доданд, аз қочоқчиён 1 350 килограмму 748 грамм маводи нашъаовар дарёфту мусодира шудааст. Аз ҷумлаи мухаддироти мусодирашуда 87 килограмму 160 граммро героин, 472 килограмму 561 грамм афюн, 605 килограмму 524 грамм ҳашиш, 183 килограмму 777 грамм бангдона (каннабис), 127 килограмму 720 грамм маводи мадҳушкунанда ташкил медиҳад. Ба иттилои манбаъ, дар ҳамин давра 1 110 238 бех ниҳоли банги ҳиндӣ дар минтақаҳои наздисарҳадӣ бо роҳи сӯзондан нобуд карда шуд, ки метавонист ба ҷони ҳазорҳо нафар хатар эҷод кунад.
Сарҳадбонони тоҷик дар доираи иҷрои уҳдадориҳои ҳарбӣ - хизматии худ, ҳамзамон, аз қочоқбарон теъдоди зиёди муҳимоти ҷангӣ, аз ҷумла 21 адад яроқи оташфишони тамғаи гуногун, 1000 дона тир, 119 норинҷаки дастӣ ва ғайраро мусодира карданд. Зимнан, 124 далели вайронкунии сарҳади давлатӣ ва 101 далели вайронкунии низоми сарҳади давлатӣ сабт гардида, дар гузаргоҳҳои марзи давлатӣ 343 нафар шахси дар рӯйхати кофтуков қарор дошта, дастгир шуданд.
Ф. ҶУМЪАЕВ, “Ҷумҳурият”
Баёни ақида (0) Санаи нашр: 01.11.2018 №: 213 Мутолиа карданд: 1178
