туризм
ИСФАРА. ШАҲРИ ТАЪРИХУ ТАМОШО
Сайёҳӣ муаррификунандаи таъриху фарҳанг, табиат ва анъанаҳои миллӣ ба ҳисоб меравад. Барои рушди ин соҳа дар кишвар ҳамаи заминаҳои зарурии меъёрии ҳуқуқӣ фароҳам оварда шуда, илова бар ин, як силсила чораҳои ҳавасмандкунӣ низ татбиқ гардидаанд.
Эмомалӣ РАҲМОН
Исфара аз ҷумлаи шаҳрҳои бостоние ба шумор меравад, ки таърихи зиёда аз сеҳазорсола дорад. Дар ин гӯшаи зебоманзари Тоҷикистони азиз беш аз 100 ёдгории таърихӣ сабт шудааст, ки аз ин шумора 45 ёдгории таърихӣ дорои аҳамияти ҷумҳуриявӣ буда, 15 ёдгории дигар аҳамияти байналмилалӣ дорад. Ин шаҳри бостонӣ дар баробари арзишҳои таърихие, ки тамаддуни инсониро комил менамоянд, ҳамчунин, дорои табиати зебову дилрабоест, ки ҳамеша мавриди таваҷҷуҳи сайёҳони дохиливу хориҷӣ қарор дорад. Исфара бо обҳои мусаффои рӯду чашмасорон, мардуми озодаву фарҳангпарвар, устоҳои нақшофарину гулдаст, боғдорони чашмикордон маълуму машҳур аст.
Имрӯз аз файзу баракати Истиқлолияти давлатӣ шаҳри Исфара боз ҳам рушду нумӯъ карда, бо бунёди иншооти гуногуни замонавӣ симои зеботаре касб кардааст. Мардуми ҳунарманди шаҳр аз ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълон гардидани соли 2018 ҳамчун Соли рушди сайёҳӣ ва ҳунарҳои мардумӣ бо камоли майл истиқбол намуда, дар эҳё ва рушду таҳкими ҳунарҳои мардумӣ камари ҳиммат бастанд.
- Мо аҳли илму зиё, бо хушнудии беинтиҳо ва ҳамзамон, бо арзу сипоси самимӣ ин иқдоми воқеан ҳам, ватандӯстонаю миллатдӯстонаи Пешвои муаззами миллат муҳтарам Эмомалӣ Раҳмонро пазируфтем. Зеро ин иқдоми беназир дар худ ҳикмати зиёд дорад. Аз ҷумла, он метавонад ба худшиносии миллӣ такони нав бахшида, бо тавсеаи ҳунарҳои мардумӣ арзишҳои миллиро ба ҷаҳониён муаррифӣ созад. Ин ташаббуси созанда дар пай манфиатҳои иқтисодӣ ҳам дорад, ки аллакай мо онро дар таҷрибаи худ дидем,- гуфт Абдуманнон Рауфов, муаррих, директори кулли осорхонаҳои шаҳри Исфара.
Дар доираи Соли рушди сайёҳӣ ва ҳунарҳои мардумӣ дар шаҳри Исфара низ ҷиҳати ҷалби сайёҳони хориҷии дуру наздик ва таъсиси хатсайрҳои нави сайёҳӣ тадбирҳои мушаххас амалӣ мешаванд.
- Бо назардошти таърихи ғанӣ аввалин хатсайр дар Исфара, албатта, ин ҳидояти меҳмонон ба мавзеъҳои қадимӣ ва таърихиву ошно шудани онҳо бо ёдгориҳост. Масалан, боздид аз мақбараи ҳазрати Шоҳ ва «Лангари моҳиён», ки дар деҳаи Чоркӯҳ қарор дошта, аз лиҳози меъморӣ ва илмӣ басо нодир арзёбӣ мешавад, мувофиқи мақсад аст. Ё ин ки аз наздик дидани катибаҳои рӯйи санги Ҷамоати деҳоти Ворух, ки ба солҳои қабл аз милод мансуб буда, бо хати куфӣ навишта шудаанд аз манфиат холӣ нест,- таъкид мекунад Абдуманнон Рауфов.
Ба иттилои Муртазо Эгамзод, мудири бахши сайёҳии мақомоти иҷроияи ҳокимияти давлатии шаҳри Исфара, феълан, дар шаҳр харитаи сайёҳӣ таҳия шуда, 7 хатсайр амал мекунад. Ба хотири он ки Исфара дорои табиати зебову нотакрор, обу ҳавои сафобахш, гиёҳҳои шифобахш, боғҳои пурмева аст, метавон дар ин самт низ рӯи иқдомҳои нав кор кард. Дар Исфара қариб 70 навъи зардолу парвариш мешавад, ки хориҷиён ба он таваҷҷуҳ доранд. Аз ин рӯ, таъсиси хатсайрҳо ба боғоти сермева ва сеху устохонаҳои кандакорӣ низ ба манфиати кор аст.
Ҳоло дар шаҳр барои роҳандозии хизматрасонии ҷавобгӯ ба меъёрҳои ҷаҳонӣ бо дастгирии мақомоти иҷроияи ҳокимияти давлатии шаҳр ва Кумитаи рушди сайёҳӣ мушкилиҳо дар иртибот ба нақлиёти махсус ҳаллу фасл шудаанд. Барои меҳмонон- сайёҳон армуғонҳои гуногуни вобаста ба таърихи мардуми шаҳр, анъанаҳои гузашта, аз касбу кор ва кортҳои махсус омода шудаанд, ки барои рушди сайёҳӣ дар шаҳри Исфара мусоидат хоҳанд кард.
Ҷовиди АШТӢ, «Ҷумҳурият»
Баёни ақида (0) Санаи нашр: 01.11.2018 №: 213 Мутолиа карданд: 1193
