фарҳанг
ПАРВОЗ БА СӮИ КОМЁБИҲО
Аз 2 то 4 ноябри соли ҷорӣ дар шаҳри Деҳлӣ – пойтахти Ҷумҳурии Ҳиндустон Фестивали байналмилалии ҳунарҳои зебо ва фарҳанги махсус барои ҳунармандони маъюб баргузор мегардад. Дар ҳамоиш ҳунармандон аз сад кишвари дунё ширкат меварзанд. Дар ин ҳамоиши байналмилалӣ Тоҷикистонро ҳунарманди Ансамбли давлатии «Фалак» - и Кумитаи телевизион ва радиои назди Ҳукумати Ҷумҳурии Тоҷикистон, сарояндаи хушовоз Матлуба Раҳимова ва мутахассиси рақси рӯи аробача Шоҳзода Султонбоева муаррифӣ мекунанд.
Пеш аз сафар бо Матлуба ва Шоҳзода суҳбате доштем, ки ҳадафу нақшаҳои онҳоро бозгӯ мекунад.
Матлуба Раҳимоваро аллакай пиру ҷавони Тоҷикистон хуб мешиносанд. Ӯ бо овози маҳину дилнавозаш, бавижа бо суруди «Зиндагӣ дард асту дард аст…» ба дилу дидаҳо раҳ ёфтааст.
- Хушбахтона, моро Худо, агар аз як тараф маҳдуд карда бошад, аз тарафи дигар истеъдод додааст. Маро низ маҳорати овозхониам ба ин фестифали бузург роҳхат дод. Ба Иттиҳодияи миллии маъюбони Тоҷикистон, Сафорати Ҷумҳурии Ҳиндустон дар Тоҷикистон ва дигар шахсони хайрхоҳ, ки маро ба ин чорабинӣ даъват намуданд, сипос мегӯям. Бовар дорам, ки бо сари баланд бармегардем ва Ватани азизамонро шоиста муаррифӣ мекунем, - изҳор дошт Матлуба Раҳимова.
Шоҳзода Султонбоева яке аз фаъолтарин духтарони Ассотсиатсияи миллии маъюбон аст ва солҳост, ки дар ҳамкорӣ бо ин ниҳод барномаҳои вижаро оид ба шахсони дорои имконияти маҳдуд роҳандозӣ мекунад. Ӯ забонҳои русию англисиро бисёр хуб медонад ва ба тарҷумонӣ низ машғул мешавад.
Бино ба гуфтаи ӯ, рақси рӯи аробачаи маъюбӣ намуди ҷадиди санъат буда, аллакай борҳо дар сатҳи ҷумҳурӣ ва дар пойтахти кишвар намоиш дода шуд. Мухлисону мутахассисони соҳа хуш пазируфтанд. Санъат инсонро аз яъсу ноумедӣ ва бекорию раҳгумӣ эмин медорад. Духтарони зебои мо низ тавассути он мехоҳанд кишварро муаррифӣ намоянд ва дар рушди кишвар саҳмгузор бошанд.
Матлуба ва Шоҳзодаро дар Фестивали байналмилалии ҳунарҳои зебо ва фарҳанги махсус барои ҳунармандони маъюб психологи Иттиҳодияи миллии маъюбони Тоҷикистон Раъно Додоҷонова ҳамроҳӣ мекунад.
Ёдовар мешавем, ки ҳадафи аслии фестивали мазкур баланд бардоштани сатҳи огоҳӣ дар бораи ҳуқуқу озодиҳои шахсони дорои имконияти маҳдуд, дастгирии иҷтимоии онҳо тавассути таълим ва барномаҳои гуногун, баланд бардоштани неруи онҳо, таъмини фаъолияти ин қишри ҷомеа дар ҳаёти ҷамъиятӣ мебошад.
Бузургмеҳр БАҲОДУР, «Ҷумҳурият»
Баёни ақида (0) Санаи нашр: 02.11.2018 №: 214 Мутолиа карданд: 828
