ҳуқуқ
КОНСТИТУТСИЯ ВА ИСЛОҲОТИ СИЁСИВУ ҲУҚУҚӢ
Конститутсияи Ҷумҳурии Тоҷикистон конститутсияи сифатан нав ва қабули он дар ҳаёти ҷумҳурӣ дарвоқеъ таърихӣ, сиёсӣ ва ҳуқуқӣ мебошад. Ин ҳуҷҷати бо роҳи демократӣ қабулшуда Тоҷикистонро ҳамчун давлати соҳибихтиёр, демократӣ, ҳуқуқбунёд, дунявӣ ва ягона муаррифӣ менамояд. Дар он шакли идоракунӣ, сохтори давлатӣ ва низоми сиёсӣ муайян шуда, давлати иҷтимоӣ будани Тоҷикистон муқаррар гардидааст.
Бо қабули Конститутсия тамоми рукнҳои давлат барқарор гардида, самтҳои ташаккули иҷтимоиву иқтисодӣ, ҷамъиятиву сиёсӣ ва диниву маънавии ҷомеаро дар шароити муосир инъикос менамояд. Дар заминаи Конститутсия дар Тоҷикистон ислоҳоти ҳуқуқӣ роҳандозӣ гардида, нахустин санадҳои танзимкунандаи муносибатҳои вобаста ба ташаккулёбии рукнҳои давлатдорӣ, таҳкими сохтори ҳокимияти давлатӣ ба тасвиб расидаанд.
Гузашти солҳо исбот намуд, ки роҳи интихобкардаи сокинони кишвар бо роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳи иттиҳоду суботи сиёсӣ, сулҳу ваҳдат, пешрафту тараққиёти ҳамаи самтҳои хоҷагии халқ ва ҷодаи ободию созандагӣ, рушди устувори мамлакат мебошад. Маҳз тавассути риояи талаботи Конститутсия ва таҳкими асосҳои сохтори конститутсионӣ мо аз марҳилаҳои ҷангию баъдиҷангӣ бо сарбаландӣ гузашта, ба имрӯзи хурраму шод расидем. Дар ин бора Пешвои миллат муҳтарам Эмомалӣ Раҳмон барҳақ фармудаанд: “Баъд аз қабули Конститутсия дар кишвар ислоҳоти бунёдиву фарогири сиёсиву ҳуқуқӣ ва иқтисодиву иҷтимоӣ оғоз шуда, тамоми соҳаҳои ҳаёти ҷомеа ва давлатро ба танзим даровард ва барои суботи конститутсионӣ заминаи мустақим фароҳам овард... Қобили зикри махсус аст, ки тамоми дастовардҳои ноилшудаи Тоҷикистони соҳибистиқлол бевосита ё бавосита бо қабули Конститутсия вобастагӣ доранд”.
Дарвоқеъ, агар мушоҳида кунем хомӯш намудани оташи ҷанги шаҳрвандӣ, барҳам задани нақшаҳои шуми бадхоҳони миллат, истиқрори сулҳу ваҳдати комил, таҳкими Истиқлолияти давлатӣ, эҳёи арзишҳои миллӣ, гиромидошти хотироти қаҳрамонҳои миллат, ташаккулу такомули худшиносии миллӣ, ватандӯстию меҳанпарастӣ, таъсиси парлумони касбӣ, ноил шудан ба нишондиҳандаҳои бузурги иқтисодию иҷтимоӣ ва таъмини зиндагии шоистаи сокинони мамлакат аз бузургтарин неъматҳое ба шумор мераванд, ки Конститутсияи Ҷумҳурии Тоҷикистон ба он замина гузоштааст.
Аз ин рӯ, ҳар яки моро зарур аст, ки талаботи Конститутсияи Ҷумҳурии Тоҷикистонро ба таври дақиқ риоя намуда, дар атрофи Пешвои миллат боз ҳам муттаҳидтар бошем ва дар шароити имрӯзаи ҷаҳони зудтағйирёбанда нагузорем, ки касеву чизе ба асосҳои сохтори конститутсионии мо таҳдид кунад ва оромии ҷомеаро халалдор созад.
Акобир ИЗЗАТУЛЛОЗОДА,
прокурори ноҳияи Мастчоҳ
Баёни ақида (0) Санаи нашр: 05.11.2018 №: 215 Мутолиа карданд: 862
