фарҳанг
ҶАМЪБАСТИ ОЗМУНИ “НАРОДНАЯ ГАЗЕТА”
12 ноябр дар меҳмонхонаи “Ҳайят Реҷенси” - и пойтахт маросими ҷоизасупорӣ ба ғолибони озмуни нашрияи ҳукуматии “Народная газета” сурат гирифт. Дар он намояндагони Дастгоҳи иҷроияи Президенти Ҷумҳурии Тоҷикистон, Кумитаи рушди сайёҳӣ, Вазорати фарҳанг, Сафорати Федератсияи Россия дар Тоҷикистон, роҳбарони нашрияҳои давлатӣ ва дигар кормандони ВАО ҳузур доштанд.
Дар иртибот ба Соли рушди сайёҳӣ ва ҳунарҳои мардумӣ нашрияи мазкур 1 март таҳти унвони «Рушди сайёҳӣ ва ҳунарҳои мардумӣ – роҳ ба сӯи ваҳдати халқҳо» сабқати эҷодиро барои беҳтарин мақолаҳо роҳандозӣ кард. Озмун дар ду бахш – сайёҳӣ ва ҳунарҳои мардумӣ то 1 ноябр идома ёфт. Дар ин муддат наздики 100 мақола дар саҳифаҳои нашрия интишор гардид ва аз ин миён дар ниҳоят 40 мақолаи беҳтарин мавриди баррасии ҳакамон қарор гирифт.
Дар бахши сайёҳӣ ҷои аввал насиби донишҷӯи Донишгоҳи (славянии) Россияву Тоҷикистон Нигина Қаҳҳорова, ҷойи дувум устоди варзиш Геннадий Набиев ва ҷойи сеюм насиби ходими илмии Осорхонаи миллии Тоҷикистон Хайринисо Боқиева шуд.
Дар бахши ҳунарҳои мардумӣ хабарнигори нашрияи «Народная газета» Марҳабо Зунунова, нависанда Довудшоҳ Сулаймоншоҳ ва омӯзгори ноҳияи Муъминобод Нурулло Ҳасанов мутаносибан ҷойҳои якум, дуюм ва сеюмро гирифтанд.
Барои матолиби ҷолиб журналистон Олег Соболев ва Владимир Фролов, доктори илмҳои филология Шариф Муллоев, омӯзгори Донишкадаи технология ва менеҷменти инноватсионии Кӯлоб Мадисо Саъдуллоев, хабарнигорони “Народная газета” Атригул Ризвоншоева ва Сайидо Назаров бо дипломҳои Кумитаи рушди сайёҳӣ ва туҳфаҳои хотиравии сарпарастон - меҳмонхонаи “Ҳайят Реҷенси”, ҶДММ “Рухом” ва ҶДММ “Асрори санг” қадр шуданд.
“Озмуни мо кӯшиши саҳм гирифтан дар тарғиби сиёсати бунёдкорона ва хирадмандонаи Пешвои муаззами миллат, аз ҷумла дар соҳаи сайёҳӣ ва ҳунарҳои мардумӣ мебошад, ки бо ибтикорашон соли равон таваҷҷуҳи аҳли ҷомеа ба он равона шудааст. Дар ҷараёни озмун тавассути мақолаҳои иштирокчиён вазъи имрӯза, дастовардҳои шоиста, имкониятҳои калон ва пешомадҳои соҳаи сайёҳӣ ва ҳунарҳои мардумӣ инъикос ёфтанд. Онҳо дилпур месозанд, ки соҳаи туризм воқеан метавонад омили муҳими рушди иқтисоди миллӣ ва шукуфоии бештари Тоҷикистони соҳибистиқлол гардад”, - иброз дошт сармуҳаррири нашрияи «Народная газета» Маҳбуба Камолова.
Хуршеди ҶОВИД, “Ҷумҳурият”
Баёни ақида (0) Санаи нашр: 13.11.2018 №: 220 Мутолиа карданд: 864
