номаҳо
АЗ "ҶУМҲУРИЯТ" СИПОСГУЗОРЕМ
Бо кӯшишҳои пайгиронаву роҳнамоиҳои хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвари соҳибистиқлоли мо ҳар рӯз навгониҳову пешравиҳои бузурги сиёсӣ, иқтисодӣ, иҷтимоӣ ва фарҳангию маънавӣ ба вуҷуд омада истодаанд. Мо, тоҷикистониён, шоҳидем, ки ҳар рӯзу соат ба шарофати қадамҳои мубораки Пешвои муаззами миллат ва кӯшишҳои ин абармарди ҷаҳонии сиёсат Ватани азизамон дар ҳама соҳаҳо рушд карда, Тоҷикистон машҳури олам мешавад.
Хушбахтона, дар доираи ҳамин ғамхориҳои Сарвари давлат, бо мусоидати раиси ноҳияи Варзоб Шерализода Маҳмадулло ва раиси ширкати «Сохтмони барқи Душанбе» Садриддин Саидов дар деҳаи куҳанбунёди Кӯктеппа тавассути хати нави барқ хонаҳои мардум равшану мунаввар гардид. Ин пешравӣ дар натиҷаи таҳқиқи арзи сокинон аз ҷониби рӯзномаи «Ҷумҳурият», нашри матлаб ва тадбирандешии роҳбарияти ноҳия ба даст омад.
Акнун имрӯзҳо аҳли деҳа метавонанд барномаҳои рангини шабакаҳои телевизиониро бароҳат тамошо кунанд, хонандагон аз технологияи нави муосир истифода намуда, донишҳои бунёдии худро боз ҳам сайқал диҳанд. Орзуи чандинсолаи мо ба 27 – солагии Истиқлолияти давлатӣ ва ба Соли рушди сайёҳӣ ва ҳунарҳои мардумӣ рост омад.
20 сол пеш дар мавсими зимистон барои мардуми Зидеҳ рафтану омадан ба шаҳри Душанбе, ки дар баъзе мавридҳо роҳи 24 км – ро то мавзеи Ҳушёрӣ давоми 2 рӯз тай мекарданд, мушкил буд. Ҳоло бо обод шудани роҳҳо ин мушкил низ осон шудааст.
Шукри истиқлолият, осудагӣ ва осоиштагӣ мекунем, ки бо роҳбарии хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мушкилиҳо бартараф шуда, акнун тамоми сокинони мамлакат дар ҳама фасли сол бо ҳам рафтуомад мекунанд.
Ба Нашрияи расмии Ҷумҳурии Тоҷикистон- рӯзномаи «Ҷумҳурият» миннатдории кӯктеппа-гиёнро мерасонам, ки дарди мардуми ин деҳаи дурдастро дарк намуда, пайи таҳқиқи он шуданд. Матлаби нашршуда сабаб шуд, ки дар доираи супориши Сарвари давлат оид ба вокуниш ба матлабҳои интиқодии матбуот имрӯз мо, мардуми Кӯктеппа, соҳиби барқи доимӣ шудем. Тамоми пиру барнои деҳа дуогӯ аст, ки ҳамеша рӯзнома ҳамин тавр, дархӯри мардум бошад. Дар баробари ин, аз ширкати «Сохтмони барқи Душанбе» раисаш Садриддин Саидов, хусусан саркор Қодир Неъматов, бригадир Раҷабалӣ Носиров, коргарон Носир Носиров, Муҳсин Алиев, Маъруф Носиров, Алӣ Зайдуллоев ва Сайдалӣ Раҳимов сидқан миннатдор буда, дар корҳои ояндаашон муваффақиятҳои нав ба навро орзумандем.
Ҳамчунин, ба ҳамаи онҳое, ки саҳми худро дар ин кори хайр гузоштанд, миннатдорӣ баён мекунем.
Саид САЪДУЛЛОЕВ, раиси маҳаллаи деҳаи Кӯктеппаи Ҷамоати
деҳоти Зидеҳи ноҳияи Варзоб
(аз номи сокинони деҳа)
Баёни ақида (0) Санаи нашр: 20.11.2018 №: 226 Мутолиа карданд: 2107
