номаҳо
ХУРОФОТ. ДАР МУБОРИЗА АЛАЙҲИ ОН БЕТАРАФ НАБОШЕМ!
Дар таърихи чандҳазорсолаи башарият ҳамроҳи ақидаи поки инсонӣ маҷмӯи ақидаҳои бе аслу ботил, хилофи мантиқу шариат ба вуҷуд омада, мардуми авомро гумроҳ кардааст, ки ин зуҳуроти номатлубро хурофот ном ниҳодаанд.
Ҳамин тариқ, хурофот ин расму одатҳои зараровар, андешаҳои авомфиребона, тақлиди кӯр - кӯрона мебошад, ки реша дар ҷаҳлу нодонӣ дорад.
Сад афсӯс, ки хурофотпарастӣ дар байни мардум дар ин айёми пешрафти илму фан то ҳол зиёд аст. Касоне, ки ба хурофот боварӣ доранд, аз зарари он бехабар ҳастанд ва дар як замон баъзе ин умури ботилро аз таълимоти шариати ислом мешуморанд.
Хурофотпарастӣ аз нигоҳи таълимоти дини ислом маҳкум карда мешавад, зеро ҳар феълу атворе, ки хилофи ақл бошаду пояи илмӣ надорад, мавриди мазаммат қарор мегирад ва бовар кардан ба ҳиллаву найранг, тақлиди кӯр - кӯрона ба ақидаи динии мардум таъсири манфӣ мерасонад.
Наъли ас про ба дару дарвоза задан, аз пеши мошин гурба гузарад, ба тарсу ваҳм афтодан, хуни гӯсфандро ба тани бемор молидан, ба сеҳру соҳирӣ машғул шудан ва дар моҳи сафар тӯй накардан аз ҷумлаи хурофот маҳсуб мешаванд. Тавре зикр шуд, ҳамаи ин фаъолияту урфу одатҳои зараровар пояи илмӣ надоранд.
Агар аз дидгоҳи Қуръони карим ва ҳадисҳои шариф назар афканем, дар ин сарчашмаҳои муътабар ба ақлоният, тафаккур, эътиқоду эътимоди асоснок ва судбахш даъват карда мешавад. Таваҷҷуҳи хос зоҳир кардан ба хурофот мардумро ба ҷаҳолат мебарад. Аз ин рӯ, олимон, шоирону нависандагон, ходимони дин, дар умум, аҳли зиёи кишвар бояд бар зидди хурофот мубориза барем. Оре, агар мехоҳем, воқеан, миллати тамаддунсозу пешрафта бошем.
ҲУСАЙН МӮСОЗОДА, сархатиби масҷиди марказии
Шайх Маслиҳатдини вилояти Суғд
Баёни ақида (0) Санаи нашр: 21.11.2018 №: 227 Мутолиа карданд: 2078
