иқтисод
ОБ. НАҚШИ ИН ОМИЛИ ЗИНДАГИОФАР ДАР РУШДИ БАШАРИЯТ
Аз давраи пайдоиш инсоният бо роҳи истифодаи оқилонаи захираҳои табиӣ эҳтиёҷоти худро бо неъматҳои моддӣ мепӯшонад. Дар ин маврид об неъмати бебаҳо ва арзишмандтарини табиат барои қонеъ сохтани талаботи одамон нақши асосӣ мебозад. Аз ин рӯ, гиромидошт ва мақсадноку сарфакорона истифода намудани захираҳои обӣ яке аз роҳҳои пешрафт ва рушди иқтисодию иҷтимоии кишвар муайян гардидааст.
Дар Тоҷикистони кӯҳсор ва офтобӣ 60 дарсади захираҳои оби Осиёи Марказӣ мавҷуд аст, ки он ба рушди энергетика ва дигар соҳаҳо имконияти васеъ медиҳад. Бунёди НБО «Роғун» бо ташаббус ва заҳматҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи истифодаи захираҳои обӣ ва истеҳсоли неруи барқи аз лиҳози экологӣ тоза беҳтарин намунаи сарфакорона ба кор бурдани сарватҳои табиист.
Баробари афзоиши шумораи аҳолӣ, корхонаву ташкилотҳо талабот ба оби тоза, қувваи барқ ва дигар хизматҳои маишӣ то рафт меафзояд. Бо ин мақсад Сарвари давлат муҳтарам Эмомалӣ Раҳмон сохтмони неругоҳро дар сатҳи баланд ба роҳ монданд. Боиси хушбахтист, ки 16 – уми ноябри соли равон дар Рӯзи Президенти Ҷумҳурии Тоҷикистон чархаи аввалини неругоҳ ба кор оғоз кард.
Иқтидори солонаи истеҳсолии пурраи неруи барқ аз ҳисоби ин иншооти гидроэнергетикӣ 3600 мегаватт (17 миллиард киловатт - соат) буда, ба 2 миллиард доллари ИМА баробар мебошад.
Гузашта аз ин, сарони кишварҳои Тоҷикистон ва Ӯзбекистон бунёди ду неругоҳи барқи обиро дар поёноби дарёи Зарафшон ба нақша гирифтаанд, ки марҳилаи дигари рушди энергетикаи мамлакат мебошад. Бовар аст, ки мутахассисони ватанӣ аз уҳдаи бунёди босифати иншооти номбурда бо сарбаландӣ мебароянд, чунки онҳо дар ҷараёни сохтмони НБО «Роғун» ва дигар неругоҳҳои кишвар таҷрибаю малакаи зиёд андӯхтаанд.
Дар ростои пешравиҳои нав ба нав замони муосир бо шароити босуръат тағйирёбандаи рушд ба мардуми мо вазифаҳои дигарро пеш мегузорад, ки иҷрои онҳо барои ноилшавӣ ба пешрафти васеътар хеле муҳим мебошад.
Дар ин маврид дар Стратегияи миллии рушди Ҷумҳурии Тоҷикистон барои давраи то соли 2030 Ҳадафҳои Рушди Устувор ва таъмини зиндагии шоистаи мардум муқаррароти худро ёфтаанд. Таъмини истиқлолияти энергетикӣ ва истифодаи самарабахши неруи барқ, аз бунбасти коммуникатсионӣ баромада, ба кишвари транзитӣ табдил ёфтан, таъмини амнияти озуқаворӣ ва дастрасии аҳолӣ ба ғизои хушсифат, вусъатдиҳии шуғли пурмаҳсул аз ҳадафҳои асосии стратегияи мазкур мебошанд. Ба фаъолият оғоз намудани НБО “Роғун” дар роҳи амалӣ гардидани ҳадафҳои номбурда бузургтарин заминаест, ки аз ҷониби Президенти кишвар муҳтарам Эмомалӣ Раҳмон гузошта шуд.
Акнун мо, мардуми Тоҷикистони азиз, имконияти бештар пайдо намудем, ки нақшаю чорабиниҳои Стратегияи миллии худро амалӣ намуда, ба муваффақияту комёбиҳои баландтар ноил гардем.
Хушбахт АҲМАДОВ,
Беҳзод АЗИЗҚУЛОВ,
устодони Донишгоҳи давлатии молия
ва иқтисоди Тоҷикистон
Баёни ақида (0) Санаи нашр: 03.12.2018 №: 237 Мутолиа карданд: 1004