фарҳанг
ОСОРХОНАҲОИ ТАЪЛИМӢ. ИСФАРА НАМУНАИ ИБРАТ АСТ
Исфара таъриху фарҳанги бою рангин дорад. Далели равшани ин гуфтаҳо зарфи обгирии ба асри VI то мелод тааллуқдошта мебошад, ки аз Исфара пайдо шуда, ҳоло дар толори шуъбаи таърихи бостон ва асрҳои миёнаи Осорхонаи миллии Тоҷикистон ба намоиш гузошта шудааст. Намунаҳои дигари коллексияҳое, ки аз гузаштаи дури шаҳр дарак медиҳанд, дар осорхонаҳои худи Исфара маҳфузанд.
Ба хотири ҳифзу нигаҳдории мероси таърихию фарҳангӣ ва тарбияи насли наврас дар рӯҳияи худогоҳиву ватандӯстӣ дар сохтори муассисаҳои таълимии шаҳр осорхонаҳо таъсис ёфтаанд. Мувофиқи иттиллои шуъбаи маорифи шаҳр, айни ҳол теъдоди осорхонаҳои таълимӣ шаш ададро ташкил медиҳад.
Осорхонаи таърихӣ - кишваршиносии муассисаи таҳсилоти миёнаи умумии № 36 - и Ҷамоати деҳоти Чилгазӣ бо ташаббуси Каримҷон Ҳамроев таъсис дода шудааст. Масоҳати он 20 метри мураббаъро ташкил мекунад. Дар фонди осорхона беш аз 3000 экспонат ҷамъоварию нигаҳдорӣ мешавад, ки таркиби он аз ашёи рӯзгор, маснуоти санъати ороишию амалӣ, сиккаҳо, китобҳои нодир, ҳуҷҷатҳо, расмҳо, наворҳои видеоӣ иборат мебошад.
Осорхонаи таърихӣ - кишвар-шиносии муассисаи таҳсилоти миёнаи умумии № 23 - и Ҷамоати деҳоти Ворух соли 1980 бо ташаббуси Б. Холматов ва А. Ғоибназаров бунёд шудааст. Масоҳати осорхона 60 метри мураббаъро ташкил карда, дар фонди он наздики 1000 экспонат маҳфуз аст. Дар ҷамъоварии он хонандагони муассисаи таҳсилотӣ ва аҳолии маҳаллӣ саҳмгузоранд. Асоси фонди осорхона аз маводи бостоншиносию мардумшиносӣ, сиккашиносӣ, ашёи рӯзгор, маснуоти санъати ороишию амалӣ, асарҳои рассомӣ ва расму ҳуҷҷатҳо иборат мебошад. Нодиртарин ашёи осорхона кӯзаҳои асри V - VII, санги ҷувозхона мутаалиқ ба асри VIII маҳсуб меёбад. Осорхона чорабиниҳои маърифатиро, аз қабили семинару вохӯриҳо бо олимону нависандагон ва собиқадорони ҷангу меҳнат мунтазам ба роҳ мондааст, ки дар тарбияи хонандагон таъсири мусбат мерасонад.
Осорхонаи таърихии муассисаи таҳсилоти миёнаи умумии № 30 соли 1997 дар масоҳати 48 метри мураббаъ ташкил шудааст. Ашё ва коллексияи фонди осорхона инъикоскунандаи таърихи муассисаи мазкур ва ҳаёту фаъолияти собиқадорони ҷангу меҳнати маҳаллӣ мебошанд. Инчунин, дар осорхона ашёи бостоншиносӣ ва ҳуҷҷатҳои таърихӣ нигаҳдорӣ мешаванд.
Осорхонаи адабии муассисаи таҳсилоти миёнаи умумии № 50 - и Ҷамоати деҳоти Ворух соли 2002 дар масоҳати 62 метри мураббаъ таъсис дода шудааст. Сарварии осорхонаро Мунира Ғоибназарова, омӯзгори фанни забон ва адабиёти тоҷик, ба зимма дорад. Фонди осорхона дорои 1200 экспонат мебошад.
Бо назардошти зарурати тарбияи насли наврас дар рӯҳияи хештаншиносӣ ва мутобиқ гардондани фаъолияти осорхонаҳои муассисаҳои таълимии кишвар ба талаботи замона зарур аст, ки осорхонаҳо дар тамоми шаҳру ноҳияҳо бо биноҳои барҳавою кушод таъмин гардида, бо таҷҳизоти замонавӣ муҷаҳҳаз гардонда шаванд. Ҳамчунин, зарур аст, ки осорхонаҳо бо шабакаи Интернет пайваст гарданд. Ҷудо намудани воҳиди алоҳидаи корӣ низ аз манфиат холӣ нахоҳад буд.
Хуршеда МУЪМИНОВА, мудири шуъбаи фаъолияти
иҷтимоӣ - фарҳангии Пажӯҳишгоҳи фарҳанг
ва иттилоот
Баёни ақида (0) Санаи нашр: 12.12.2018 №: 245 Мутолиа карданд: 836
