фарҳанг
БАЗМИ ЧАКАН ДАР ШАҲРИ КӮЛОБ
Бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 29 ноябр бунёди маориф ва илму фарҳанги Созмони Милали Муттаҳид - ЮНЕСКО нигораҳои чаканро ба рӯйхати мероси фарҳангии ғайримоддии фарҳанги ҷаҳон ворид кард. Ба ин муносибат дар шаҳри Кӯлоб нишасти хотирмони фарҳангие баргузор гашт.
Дар толори қасри фарҳанг аз ҷониби ҳунармандони чакандӯз, муассисаҳои таълимии оливу миёнаи махсус намоиши ҳунарҳои мардумӣ, аз қабили кӯрпаву болишт, тоқиву унсурҳои гаҳвора, куртаву чодарҳои арӯсӣ, бардевориҳо ва дигар нақшу ороишот ба намоиш гузошта шуданд.
Дар чорабинии тантанавӣ Хайрулло Амонулло, раиси шаҳри Кӯлоб, ҳозиронро бо ин рӯйдоди таърихӣ табрик гуфта, изҳор дошт, ки Кӯлоб ватани аслии чакан аст. Чакан ифодакунандаи зебоӣ, рамзи ҳамгироии инсону табиат ва инсондӯстӣ мебошад. Ҳар гуле, ки бо нӯги сӯзан офарида мешавад, шинохти дунёест, ки асрҳо боз дар шуури мо нақш бастааст. Он гувоҳи ривоҷи маънавиёт, ғояҳои инсонгароии миллати мо буда, аз фарҳанги бою ғании халқамон дарак медиҳад.
Дар шаҳр бо роҳбарии Зариф Валиев ҷамъияти дорои масъулияти маҳдуди «Чакан» фаъолият менамояд, ки ба он 50 нафар ҳунарманд ҷалб гардидааст. Аз тарафи мақомоти иҷроияи ҳокимияти давлатӣ барои соҳибкорон 2 бино ҷудо гардида, 45 нафар занон ва духтарон фаъолият доранд. Дар маҳаллаи ба номи Розия Абдушукурова таҳти роҳбарии Муродалӣ Боронов коргоҳи хурди дӯзандагӣ таъсис ёфтааст, ки чеварон машғули чакандӯзиву зардӯзианд. Дар маҳаллаи Тамошотеппа ҳунарманди чирадаст Савронбӣ Ҳасанова бо аҳли оилаи худ ба чакандӯзию гулбаст машғул буда, беш аз 30 нафар шогирд тарбия кардааст. Дар маҳаллаи Борбад Мавлуда Сафарова 15 нафар ва дар маҳаллаи Ориёно соҳибкор Нисо Шайдуллоева 10 сокини маҳаллиро ба чакандӯзӣ ҷалб намуда, дар байни мардум шинохта шудаанд.
Дар чорабинии фарҳангӣ ба як зумра ҳунармандони чакандӯз раиси шаҳр ифтихорнома ва туҳфаҳо тақдим намуд, санъаткорон табъи ҳозиронро бо таронаву рақсҳои дилошӯби мардумӣ болида гардонданд.
Сулаймон СУЛТОН, мудири бахши бойгонӣ – матбуотии шаҳри Кӯлоб
Баёни ақида (0) Санаи нашр: 13.12.2018 №: 246 Мутолиа карданд: 831
