президент
Шӯрои машваратии назди Сардори давлат фазои сармоягузориро баррасӣ намуд
8 декабр таҳти раёсати Президенти Ҷумҳурии Тоҷикистон Эмомалӣ Раҳмон ҷаласаи IV-и Шӯрои машваратии назди Сардори давлат оид ба беҳтар кардани фазои сармоягузорӣ доир гардид.
Дар ҷаласаи IV –и Шӯрои машваратӣ аъзои Шӯро, масъулони Ҳукумати мамлакат, Дастгоҳи иҷроияи Президенти Ҷумҳурии Тоҷикистон, роҳбарони вазорату идораҳои дахлдор ва намояндагони созмонҳои байналмилалии мададрасон иштирок намуданд.
Оид ба рафти татбиқи барномаи «200 – рӯзи ислоҳот» ва беҳсозии фазои сармоягузорию соҳибкории кишвар ҳисоботи роҳбарони вазорату идораҳои дахлдори мамлакат, аз ҷумла, вазоратҳои рушди иқтисод ва савдо, молия, меҳнат ва ҳифзи иҷтимоии аҳолӣ, корҳои хориҷӣ, Бонки миллӣ, Кумитаи давлатии омор ва Агентии сохтмон ва меъморӣ ва ҳамчунин гузориши намояндагони созмонҳои байналмилалии мададрасон чун Кордори Иттиҳоди Аврупо, Агентии Иёлоти Муттаҳидаи Амрико оид ба рушди байналмилалӣ, Корпоратсияи байналмилалии молиявӣ ва Кӯмаки техникии Олмон шунида шуд.
Зимни ҷаласаи IV –и Шӯрои машваратӣ бо қаноатмандӣ зикр гардид, ки дар доираи татбиқи барномаи «200 – рӯзи ислоҳот» механизми «Равзанаи ягона» дар бақайдгирии субъектҳои соҳибкорӣ 6 моҳ пеш аз мӯҳлат ба кор шурӯъ намуд ва имрӯз фаъолияташ дар назди мақомоти андози шаҳру ноҳияҳои мамлакат бо муваффақият ба роҳ монда шудааст.
Ҳамчунин иттилоъ дода шуд, ки як комиссияи ҳукуматӣ ва вазорату идораҳои дахлдор баҳри кам кардани шумораи иҷозатномаҳо ва бартараф намудани ҳамаи расмиёти маъмурӣ, ки ба соддагардонии фаъолияти соҳибкорӣ монеа мешаванд, чораҳои муассир андешида истодаанд, аз ҷумла тариқи таҳияи санадҳои нави қонунгузорӣ ва тағйиру иловаҳо ба санадҳои меъёрии амалкунанда.
Аъзои шӯро ва намояндагони созмонҳои байналмилалии мададрасон ба рафти татбиқи барномаи «200 - рӯзи ислоҳот» баҳои мусбат дода, бо назардошти он ки беҳсозии фазои соҳибкорию сармоягузорӣ бевосита таҳти роҳбарии Сардори давлат Эмомалӣ Раҳмон амалӣ мегардад, дурнамои ин корро умедбахш арзёбӣ намуданд.
Баёни ақида (0) Санаи нашр: №: Мутолиа карданд: 3550
