иқтисод
ТОҶИКИСТОН ВА ТАҶРИБАИ ИСТИФОДАИ ОҚИЛОНАИ ОБ
Тадбирҳои андешидаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва натиҷаи ташаббусҳои қаблии ҷониби Тоҷикистон оид ба ҳалли масъалаҳои марбут ба оби ошомиданӣ сабаб шуд, ки 21 декабри соли 2016 Маҷмаи умумии СММ Қатъномаи A/RES/71/222 - ро пазирад.
Қатъномаи мазкур Даҳсолаи байналмилалии амал “Об барои рушди устувор, солҳои 2018-2028” унвон дошта, бо иттифоқ ва бо ҳаммуаллифии 177 кишвари узви СММ қабул шуд.
Сарвари давлат Эмомалӣ Раҳмон дар Паёми хеш, ки 22 декабри соли 2017 ироа намуданд, ба аҳамияти байналмилалии ташаббусҳои Тоҷикистон таъкид варзида, гуфта буданд: “Ҳар сол танҳо бо сабаби норасоии оби тозаи ошомиданӣ як миллиону 400 ҳазор кӯдак азият кашида, ҳар дақиқа як кӯдаки навзод аз бемориҳои сироятии вобаста ба норасоии оби тоза ва муҳити пок ба ҳалокат мерасад. Ҳамасола аз шумораи умумии аҳолии сайёра бо сабаби норасоии об 3 миллиону 400 ҳазор нафар вафот мекунад. Ғайр аз ин, қариб 800 миллион нафар аҳолии сайёра аз норасоии ғизо азият кашида, як миллиард кӯдак дар шароити қашшоқӣ зиндагӣ ва бо ҳамин иллат, ҳар сол 22 ҳазор нафари он вафот мекунад».
Ин ҳама рақамҳо далолат бар он мекунанд, ки пешниҳоди Даҳсолаи нави байналмилалии амал “Об барои рушди устувор, солҳои 2018 - 2028”, бар нафъи аҳли башар аст ва маълумоти дақиқу пурмуҳтаво ва таклифу пешниҳодҳои асосноку созандаро дар пай дорад.
Мувофиқи маълумоти дигар, 31 дарсади муассисаҳои таҳсилоти умумии ҷаҳон ба оби тоза дастрасӣ надоранд. Сипоси ин табиату сарзамин мекунем, ки саршор аз обҳои мусаффост. Мо хушбахтона, обҳое дорем, ки на танҳо ошомиданӣ, балки табобативу дармонбахшанд. Кӯдакони мо ҳам дар хона ва ҳам дар мактабу боғчаҳо ба оби нӯшиданӣ дастрасӣ доранд. Акнун, ҳар чи бештар фарҳанги сарфакориро байни ҷомеа ташвиқ намоем, то носипосии неъмат нашавад.
Дар мавриди оқилона истифода бурдани об низ халқу миллати мо намунаи ибрат гашт. Зеро шукӯҳмандтарин иншооти аср – НБО «Роғун» -ро сохт, ки ҳам мардуми худ ва ҳам ҳамсоякишварҳоро бо рӯшанию гармӣ таъмин менамояд.
Одина ДАВЛАТОВ,
директори китобхонаи ДАТ ба номи Шириншоҳ Шоҳтемур
Баёни ақида (0) Санаи нашр: 18.12.2018 №: 249 Мутолиа карданд: 1065