иқтисод
БАДАХШОН. МАҲСУЛОТИ ҒАЙРИСТАНДАРТӢ НОБУД КАРДА ШУД
Баланд бардоштани сифату бехатарии хӯрокворӣ, ҳимояи бозори истеъмолӣ аз воридоти маҳсулоти пастсифат ва ҳимояи ҳуқуқи истеъмолкунандагон ҳамеша зери таваҷҷуҳи давлату Ҳукумат қарор дорад. Назорати сифати маҳсулоти фурӯхташаванда вазифаи муҳими сохторҳои марбута муқаррар шуда, дар ин самт назорат торафт пурзӯртар мегардад. Аз ҷумла, соли равон мубориза алайҳи фурӯш ва истеъмоли машруботи пастсифати спиртӣ дар Вилояти Мухтори Кӯҳистони Бадахшон аз ҷониби ниҳодҳои давлатӣ вусъат ёфт.
Санҷишу таҳлилҳо нишон доданд, ки фурӯши машруботи пастсифати спиртӣ дар ҳамаи минтақаҳои вилоят ба мушоҳида расида, шумораи нафарони ба касалии майзадагӣ гирифтор рӯ ба афзоиш аст. Ҳатто ҳодисаи фавти одамон бар асари истеъмоли машруботи ғайристандартӣ рух додааст. Бинобар ин, Раёсати стандартизатсия, метрология, сертификатсия ва нозироти савдои ВМКБ ҷиҳати мубориза бо фурӯшу истеъмоли маҳсулоти пастсифати спиртӣ давоми соли ҷорӣ фаъолияташро пурзӯр намуд.
Агар охири соли гузашта дар шаҳри Хоруғ ва ноҳияҳои вилоят 135 нуқтаи фурӯши машруботи спиртӣ фаъолият дошт, имсол то аввали моҳи декабр миқдори онҳо то 60 адад кам карда шуд. Бар замми ин, дар натиҷаи санҷишу тафтишоти иловагии раёсат нуқтаҳои фурӯши машруботи спиртӣ, ки бе қарор ва иҷозатнома фаъолият доштанд, манъ гардид.
Аз тарафи масъулони соҳа дар 17 манзили истиқоматии шаҳрвандон, аз ҷумла дар ноҳияҳои Шуғнон 11 нуқта, Роштқалъа 4 ва Ишкошим 2 нуқтаи фурӯши машруботи спиртӣ ошкор гардида, фаъолияти онҳо қатъ карда шуд. Дар маҷмӯъ, давоми 11 моҳи соли ҷорӣ 30 соҳибкор барои фурӯши машруботи спиртии ғайристандартӣ 3500 сомонӣ ҷарима шуд.
Назорати сифати маҳсулот ва пешгирии воридоти хӯроквории ғайристандартӣ, аз ҷумла машруботи спиртӣ дар меҳвари фаъолияти раёсати номбурда қарор дорад. Кормандони он тайи 11 моҳи соли равон дар ҳамкорӣ бо дигар мақомоти назоратӣ дар шаҳри Хоруғ чанд маротиба рейди муштарак гузаронда, маҳсулоти нуқтаҳои фурӯшро мавриди санҷиш қарор доданд. Дар натиҷа, 197 намунаи арақи тамғаҳои гуногун ба миқдори 26277 шиша аз муомилот гирифта шуд. Ҳангоми ташхис 95 намунаи онҳо 10207 шиша ғайристандартӣ баромада, аз тарафи комиссияи ваколатдор нобуд гардид. Ҷараёни маҳвсозии машруботи ғайристандартӣ тариқи телевизионҳои маҳаллию ҷумҳуриявӣ нишон дода шуд.
Ҳамчунин, бо сабаби хатарнок будани истеъмоли аз ҳад зиёди нӯшокиҳои спиртии қувватбахши «Ягуар» ва «Страйк» ба миқдори 3849 адад аз муомилот гирифта шуд.
Н. САБЗАЛИЕВ,
сардори раёсати стандартизатсия, метрология, сертификатсия
ва нозироти савдои ВМКБ
Баёни ақида (0) Санаи нашр: 19.12.2018 №: 250 Мутолиа карданд: 915