туризм
ҲУНАР САРМОЯ АСТ
Эълон гардидани соли 2018 ҳамчун Соли рушди сайёҳӣ ва ҳунарҳои мардумӣ аз ҷониби Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷумлаи ташаббусҳои мондагорест, ки дар рушди ин ду соҳаи ба ҳам алоқаманду судовар таҳаввулоти нав бахшид. Натиҷаҳои ин иқдоми наҷиби Сарвари давлат нишон медиҳанд, ки ҳам дар бахши сайёҳӣ ва ҳам тавсеаи ҳунарҳои мардумӣ дигаргуниҳои мусбат ба миён омаданд. Аз ҷумла, ҳунармандони гулдасти тоҷик бо истифода аз чунин фурсати муносиб бо диди нав ба касбу кори пуршарафи худ рӯ оварданд ва аз натиҷаи заҳмати хеш суди иқтисодӣ бардоштанд.
Саида Раҳмонбердиева, сокини ноҳияи Кӯшониён аз зумраи нафаронест, ки қолинбофиро аз падар ба мерос гирифта дар ин самт шогирдони зиёде тарбия намудааст. Ӯ аз овони хурдсолӣ ба ин касб майлу рағбати беандоза дошт. Чун падараш дар ин ришта ҳунарманди чирадаст буд ва қолинбофӣ дар ин оила аз насл ба насл мерос мондааст.
Чуноне, ки Саида иброз дошт, падараш дар сехӣ қолинбофӣ фаъолият мекард ва ҳамон солҳо падар ҳунару маҳорати духтари хурдсолашро дида, ӯро ҳамроҳаш ба сехи қолинбофӣ мебарад, то нозукиҳои ҳунарро аз худ намояд. Чун Саида ба воя расид, падараш ӯро дар сех ба кор ҷалб намуд. Аз он замон ин бону бештари умри худро ба қолинбофӣ гузарондааст.
Мавсуф дар ин муддат беш аз 20 шогирд тарбия намуда, нозукӣ ва асрори қолинбофиро ба онҳо омӯзондааст. Айни ҳол, бештари онҳо дар хонаҳояшон ба қолинбофӣ машғуланд ва ҳамзамон, ин ҳунарро ба дигарон меомӯзанд. Яъне, шогирдони Саида ҳам шогирдонеро дар риштаи қолинбофӣ тарбия менамоянд.
- Бароям мояи ифтихор аст, ки аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2018 - Соли рушди сайёҳӣ ва ҳунарҳои мардумӣ эълон гардид. Зеро барои мо - ҳунармандон имконият пайдо шуд, ки боз ҳам маҳорати хешро ривоҷ дода, он ҳунарҳое, ки аз қадим ба мо боқӣ мондаанд, аз нав зинда намоем. Имрӯзҳо шоҳиди он ҳастем, ки дар партави ин ташаббус бо дастгирии Ҳукумати ҷумҳурӣ занону духтарони хонашине, ки ҷойи кори доимӣ надоранд, ба омӯхтани касбҳо ҷалб мешаванд ва дар сехҳои дӯзандагӣ бо кор таъмин мегарданд. Ба ин тартиб сатҳи зиндагии худро беҳтару хубтар месозанд. Пас, дар ҷавоб ба чунин ғамхориҳои давлату Ҳукумат моро зарур аст, ки барои рушди бештари ҳунарҳои мардумӣ талош варзем,- гуфт Саида Раҳмонбердиева.
Маҳмуд БАҲРОМ, «Ҷумҳурият»
Баёни ақида (0) Санаи нашр: 20.12.2018 №: 251 Мутолиа карданд: 1156
