номаҳо
ТИБРО БА ТИҶОРАТ ТАБДИЛ НАДИҲЕМ!
Хизматрасонии тиббӣ дар бахши дандонпизишкӣ бо он ки камбудиҳои зиёд дорад, боз гаронарзиш ҳам мебошад. Фикр мекунам, ҷоиз нест, ки соҳаи мазкур ба тиҷорат табдил ёбад.
Сарвари кишвар таъкид намуданд, ки аз 254 муассисаи табобати дандон ҳолати чанде нигаронкунанда аст ва андешидани тадбирҳои заруриро мехоҳанд. Риоя кардани қоидаҳои санитарӣ ва тавсияи дорувории дуруст бояд барои ҳар як табиби ихтисосманди соҳа шарти аввалини фаъолият бошад. Ҷои инкор нест, ки баъзе табибон бо камсаводиву бетаҷрибагиву бемасъулиятии худ дар рафти муолиҷаи дандон чанд беморӣ ё вируси дигарро ба беморон интиқол медиҳанд.
Аз ҷумла, бо мо ҳам ҳамин ҳолат рух дод. Бемори мо низ баъди табобати дандон дар лабаш сӯзиш пайдо шуда, ҳолаш бад шудан гирифт. Шукр, ки ҳанӯз табибони ботаҷрибаю боинсоф ҳастанд. Яке аз онҳо марди хайрхоҳу ботавозӯъ ва бофаросату бофарҳанг Маҳмадулло Қосимзода аст. Ӯ дар Пажӯҳишгоҳи илмиву клиникии стоматология ва ҷарроҳии ҷоғу рӯй ба ҳайси мудир фаъолият мебарад. Аз вохӯрии нахустин эҳсос кардем, ки ӯ марди баинсоф аст ва барояш табобат даҳҳо маротиба муҳимтар аз тиҷорат аст. Хушмуомилагӣ ва донишмандиву тавозӯии ин мард барои аксар табибон намунаи ибрат аст. Ин пажӯҳишгоҳ тозаву бонизом мебошад. Ҳуҷраҳои беморон тозаву шароити лозима мавҷуд аст. М. Қосимзода моро хеле дилбардорӣ намуда, бовар бахшид, ки ин дардро рафъ кардан мумкин аст.
Аз рӯи мушоҳидаҳо чунин ба назар мерасад, ки аллакай даҳҳо нуқтаҳои дандонпизишкӣ баста шудаанд. Вазорати тандурустӣ ва ҳифзи иҷтимоии аҳолӣ бо дастури Роҳбари давлат амри хайреро ба иҷро расонда истодааст. Доруҳо ва сифату муҳлати онҳо санҷида мешаванд. Тарафдори он ҳастем, ки табибони камтаҷриба бо тақдири мардум бозӣ накунанд.
Дар охир, хоҳиш мекардем, ки Хадамоти давлатии санитарӣ ва дигар сохторҳои Вазорати тандурустӣ ва ҳифзи иҷтимоии аҳолӣ назоратро аз болои ин гуна нуқтаҳо ва ашхосе, ки тибро ба тиҷорат табдил додаанд, пурзӯр намоянд.
Ҳабибулло ҚУТБИДДИНОВ,
сокини ноҳияи Файзобод
Баёни ақида (0) Санаи нашр: 20.12.2018 №: 251 Мутолиа карданд: 2546
