порлумон
МОДЕЛИ НАВИ ПЕШГӮӢ Ё ТАСВИБИ СОЗИШНОМАҲОЕ, КИ БА ТАТБИҚИ ЯК ТАРҲИ МУҲИМ НИГАРОНДА ШУДААНД
Бо мақсади насби дастгоҳҳои назоратӣ ва низоми огоҳонӣ, инчунин, таҳияи модели нави пешгӯии обхезиҳо барои ноҳияҳои пилотии ҷумҳурӣ, аз ҷумла ноҳияҳои Панҷ, Ишкошим, Шуғнон, Рӯшон, Шамсиддини Шоҳин тарҳи тозае рӯи даст гирифта шуд.
Дар ин робита вакилони Маҷлиси намояндагони Маҷлиси Олӣ ду созишнома- Созишномаи грантӣ байни Ҷумҳурии Тоҷикистон ва Бонки осиёии рушд оид ба лоиҳаи «Идоракунии захираҳои об дар ҳавзаи дарёи Панҷ – маблағгузории иловагӣ», Созишномаи грантӣ байни Ҷумҳурии Тоҷикистон ва Бонки осиёии рушд оид ба лоиҳаи «Идоракунии захираҳои об дар ҳавзаи дарёи Панҷ – маблағгузории иловагӣ» - ро ба маблағи умумии 11,5 миллион доллар баррасӣ ва тасвиб намуданд.
Қаҳҳорзода Файзиддин, вазири молияи Ҷумҳурии Тоҷикистон, 19 декабр зимни тавзеҳи созишномаҳо дар Маҷлиси намояндагон изҳор дошт, ки ин маблағ, ҳамчунин, барои такмили ихтисоси мутахассисони Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон доир ба системаҳои огоҳонӣ вобаста ба обхезиҳо, пешгӯӣ ва омодагиҳо ба ҳолатҳои фавқулода, сохтмони се бинои алоҳида барои фаъолияти агентӣ ва ду бинои 11 - ошёнаи истиқоматӣ барои кормандони соҳа, дастгирии ҳуқуқӣ ҷиҳати такмили низоми идоракунӣ масраф мешаванд.
Вазири молия афзуд, ки татбиқи лоиҳа маҷмӯан ба рушди соҳа, бахусус барои дастрасӣ ба таҷҳизоту барнома ва технологияҳои муосири соҳавӣ, пешгӯии саҳеҳи вазъи обу ҳаво, идораи босамари захираҳои обии кишвар, амалӣ гардондани тадбирҳои зарурӣ ҷиҳати пешгирии ҳолатҳои фавқулода, рушди соҳаи кишоварзӣ ва беҳтар гардондани шароити кормандони соҳа мусоидат хоҳад кард. Амалишавии лоиҳа аз соли 2018 ба нақша гирифта шуда, то соли 2023 идома меёбад.
Мунаввари САФАР,
«Ҷумҳурият»
Баёни ақида (0) Санаи нашр: 20.12.2018 №: 251 Мутолиа карданд: 1628
