фарҳанг
РАНГОРАНГ. БАРДОШТ АЗ ФЕСТИВАЛИ БАЙНАЛМИЛАЛӢ
Баргузории Фестивали байналмилалии “Рангоранг” барои муаррифии Тоҷикистон ҳамчун сарзамини ҳунармандони асил хеле муҳим буда, истифодаи самараноки ин бренд баҳри ташрифи бештари сайёҳони хориҷӣ мусоидат хоҳад кард.
Чунин гуфта шуд дар Фестивали байналмилалии фарҳангию сайёҳии “Мероси Шоҳроҳи Абрешим” таҳти унвони “Рангоранг”, ки дар Осорхонаи миллии Тоҷикистон 18-19 декабри соли ҷорӣ баргузор гашт.
Дар фестивал роҳбарияти Кумитаи рушди сайёҳӣ, Вазорати фарҳанг, Академияи илмҳо, намояндагони корпусҳои дипломатии муқими Тоҷикистон, созмонҳои байналмилалӣ, ширкатҳои сайёҳии ватанӣ ва ҳунармандон ширкат варзида, дар он маҳсулоти ҳунарҳои мардумӣ ба намоиш ва фурӯш бароварда шуданд.
Дар ҳошияи фестивал конфронси илмӣ - амалӣ дар мавзӯи “Ёдгориҳои таърихӣ ва фарҳангӣ омили муҳими ҷалби сайёҳон” доир шуд.
Зикр гардид, ки ҳунарҳои мардумӣ дар қатори дигар захираҳои сайёҳӣ ва таъриху фарҳанги миллӣ дар намоишгоҳҳои байналмилалӣ, аз қабили ITB - Берлин, “Интурмаркет”, “MITT” Федератсияи Россия, “Топ Реса”-и Фаронса, Форум ва Намоишгоҳи “Имкониятҳои сайёҳии Тоҷикистон” дар шаҳри Сеули Корея, Алмаатои Қазоқистон, Куала-Лумпури Малайзия, Салоники Юнон, Токиои Ҷопон, Тошканди Ӯзбекистон, Риёз ва Ҷиддаи Арабистони Саудӣ, Доҳаи Қатар ва Лос-Анҷелеси ИМА ба дӯстдорони саёҳат муаррифӣ карда шуданд.
Дар ҳамин ҷода, бо ташаббуси Кумитаи рушди сайёҳӣ давоми соли равон бо мақсади муаррифии фарҳанги миллӣ ва маҳсулоти ҳунарҳои дастӣ, намоишгоҳҳои “Рӯзи заргарон”, “Рӯзи оҳангарон”, “ Рӯзи чакандӯзон” ва, инчунин, намоишгоҳи сайёҳӣ ва маҳсулоти армуғонии ҳунармандон таҳти унвони «Тоҷикистон – ҷаҳони саёҳат» пешкаши сокинони пойтахт ва сайёҳони хориҷӣ гардид.
Дар Соли рушди сайёҳӣ ва ҳунарҳои мардумӣ, ки бо ташаббуси бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардид, ба феҳристи мероси ғайримоддии фарҳангӣ ворид шудани “Чакан” эътирофу эҳтироми ҷомеаи ҷаҳонӣ ба тамаддуну фарҳанги ғании халқи тоҷик мебошад.
Ҳунарҳои мардумӣ, ҳамчунин, дар чорабиниҳои миллӣ, аз ҷумла Форум ва намоишгоҳҳои байналмилалӣ дар шаҳрҳои Исфара ва Норак, фестивали сайёҳии “Наврӯз – мероси фарҳангии сайёҳӣ”, фестивали “Ҷилваи чакан”, Фестивали байналмилалии сайёҳии таомҳо ва пуфакҳои ҳавоии “Пур Нур” дар шаҳри Душанбе ба таври шоиста таблиғу ташвиқ гаштанд.
Ш. ҚУРБОН, “Ҷумҳурият”
Баёни ақида (0) Санаи нашр: 20.12.2018 №: 251 Мутолиа карданд: 853
