энергетика
"РОҒУН". САҲИФАИ ЗАРРИНИ ТАЪРИХ
Ҳукумати Ҷумҳурии Тоҷикистон ҷиҳати таъмини минбаъдаи кишвар бо барқу гармӣ тавассути барқарор намудани неругоҳҳои мавҷуда ва ба кор андохтани иқтидорҳои иловагӣ, бунёди хатҳои нави интиқоли барқ ва истифодаи сарфакоронаи он пайваста тадбирҳои муассир андешида, соҳаи энергетикаи кишварро ба таври назаррас пеш бурда истодааст.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рушди ояндаи иқтисоди кишварро дар асоси захираҳои бузурги гидроэнергетикӣ аз бунёди иқтидорҳои нави истеҳсоли қувваи барқ дониста, барои ҳалли масоили мавҷудаи соҳа, пеш аз ҳама, ба бунёду барқарорсозии НБО «Роғун» ҷаҳду талош намуданд. Миллати баору номус бо раҳнамоии Сарвари бузургу кордон ба сохтмони иншооти азими аср пардохт. Ҳисси баланди ватандории мардуми накуноми тоҷик боис гардид, ки Ҷумҳурии Тоҷикистон дар бунёди неругоҳи беназир сарфароз гардад. Пиру барно, кулли қишрҳои ҷомеа ҳар чи зудтар бунёду ба истифода додани ин иншоотро ҳадафи хеш донистанд. Бо ҳидоятҳои Сарвари давлат ҷавонон майдони сохтмони «Роғун» - ро ҷойи пурифтихор ва эътибори воло дониста, бо иттиҳод санге бар болои санге ниҳоданд. Ниҳоят кохи нуру маърифатро обод карданд.
Ба хотир овардани як лаҳзаи таърихӣ барои исботи гуфтаҳои боло кифоя аст.
Натиҷаи заҳматҳои шабонарӯзии халқи меҳнатқарини тоҷик бо сарварии Пешвои муаззами миллат буд, ки 16 ноябри соли ҷорӣ агрегати якуми ин иншооти муҳим ба кор даромад ва боби наве дар рушди давлатдорӣ боз гардид. НБО «Роғун» ҳамчун арсаи созандагӣ баробари бахшидани нуру зиё ба хонадони тоҷик, баракату фаровонӣ, эҳтироми миллату Меҳан ва дӯстиву ҳамдилиро миёни шаҳрвандон бештар намуд. Ин рӯйдоди оламгир пурарзиштарин дастоварди сол ва лаҳзаи натиҷагирӣ аз заҳмати бунёдкоронаи мардуми тоҷик маҳсуб меёбад.
Б. ҲАКИМОВА, сардори шуъбаи
таҳлил ва робита бо ҷомеаи ДДҲБСТ
Баёни ақида (0) Санаи нашр: 20.12.2018 №: 251 Мутолиа карданд: 13580
