иқтисод
ОМОР. ЯК ТАҲҚИҚОТИ МУҲИМ
Агентии омори назди Президенти Ҷумҳурии Тоҷикистон якҷо бо Вазорати тандурустӣ ва ҳифзи иҷтимоии аҳолии ҷумҳурӣ дар шаҳри Душанбе натиҷаҳои таҳқиқоти тиббӣ-демографӣ - 2017 (ТТД) - ро муаррифӣ намуд.
Натиҷаҳои таҳқиқот нишон доданд, ки давоми панҷ соли охир вазъи солимии аҳолӣ бамаротиб беҳтар шудааст. Агар соли 2012 аз шумораи умумии навзодон 88 дарсад ба қайд гирифта шуда бошад, ин нишондиҳанда соли гузашта 96 дарсадро ташкил медиҳад. Айни замон 96 дарсади таваллуди кӯдакон дар муассисаҳои тиббӣ сурат мегирад, ки ин рақам панҷ сол қабл 88 дарсадро дар бар мегирифт. Дар ин муддат, вазъи қадпастию камвазнии кӯдакони то панҷсола аз 26 дарсади соли 2012 то 18 дарсад коҳиш ёфтааст. Нишондиҳандаҳои мазкур аз баланд гардидани маърифати оиладории занон ва беҳбудии хизматрасонии тиббӣ дар кишвар гувоҳӣ медиҳад.
Гулнора Ҳасанзода, директори Агентии омор, зикр дошт, ки агентӣ натиҷаҳои ниҳоии дуюмин таҳқиқоти тиббӣ - демографии Тоҷикистонро, ки соли 2017 гузаронд, барои истифодабарандагони иттилооти оморӣ пешниҳод менамояд. Таҳқиқоти мазкур бо мақсади пайдо кардани маълумоти дақиқ оид ба вазъи таваллуд, исқоти ҳамл, банақшагирии оила, фавти навзодон, солимии модару кӯдак, ғизо, ВНМО/СПИД, бемориҳои бо роҳи ҷинсӣ гузаранда, ҳуқуқҳои занон, зӯроварӣ дар хона ва масоили дигари сатҳи солимию некуаҳволӣ дар кишвар сурат гирифт. Гузарондани тадқиқоти тиббӣ - демографӣ барои таъмини иттилооти зарурӣ ҷиҳати арзёбии татбиқи воқеии стратегияву барномаҳои иҷтимоии амалкунанда, ҳамчунин, таҳияи барномаҳои навбатӣ мусоидат менамояд.
Таъмини шароитҳои арзандаи иҷтимоӣ барои аҳолии ҷумҳурӣ яке аз ҳадафҳои асосии Ҳукумати мамлакат мебошад. Таҳқиқоти мазкур дар заминаи ин ҳадафҳо бо супориши Ҳукумати кишвар аз 5 майи соли гузашта роҳандозӣ шудааст. Он баҳри баланд бардоштани сатҳи некуаҳволии мардум, муайян намудани афзалиятҳо, беҳбудии сифати хизматрасонии тиббӣ, таъмини ғизои солим, коҳиш додани сатҳи фавти модару кӯдак ва мубталошавӣ ба бемориҳои сироятӣ нақши ҳалкунанда мебозад.
Қобили зикр аст, ки то имрӯз дар Тоҷикистон ду таҳқиқоти тиббӣ - демографӣ дар солҳои 2012 - 2017 гузаронда шудааст.
Шаҳбоз АБРОР, «Ҷумҳурият»
Баёни ақида (0) Санаи нашр: 21.12.2018 №: 252 Мутолиа карданд: 916
