фарҳанг
ФАРҲАНГИ МАЪНАВӢ. ОМӮЗИШ, ТАҲҚИҚ ВА ОЯНДАБИНӢ
Чанде пеш дар Донишкадаи давлатии фарҳанг ва санъати Тоҷикистон ба номи Мирзо Турсунзода конференсияи ҷумҳуриявии илмӣ-назариявӣ таҳти унвони «Вазъияти омӯзиш ва таҳқиқи фарҳанги маънавӣ дар Тоҷикистон ва ояндабинии он» баргузор гардид. Дар кори он устодон, кормандони илмӣ, аспирантон, унвонҷӯён, докторантон аз рӯи ихтисоси PhD ва магистрони донишкада, инчунин, намояндагони Академияи илмҳои Ҷумҳурии Тоҷикистон, вазоратҳои маориф ва илму фарҳанги ҷумҳурӣ, Консерваторияи миллии Тоҷикистон ба номи Т. Сатторов, Донишгоҳи давлатии Хуҷанд ба номи академик Бобоҷон Ғафуров ва дигар донишкадаву донишгоҳҳо ҳузур доштанд.
Ҷаласаи пленариро Хайриддин Идиев, ректори донишкада, ифтитоҳ намуда, зикр кард, ки бузургону хирадмандони тоҷик бо заҳмату талоши пайвастаашон дар роҳи илму адаб тавонистаанд, ки бароямон як фарҳанги волою ғанӣ ва инсонсозро ба мерос гузоранд. Ин фарҳанг саропо аз хайр иборат аст. Фарҳанги миллии мо парчами хирадварзӣ, башардӯстӣ ва эътиқод буда, тараннумгари сулҳу дӯстӣ ва ободию осудагӣ, фаровонии неъматҳои зиндагист. Фарҳанги мо шиносномаи миллатамон мебошад, ки тавассути он чеҳраи моро ҷаҳониён қарнҳо боз хуб мешиносанд. Хушбахтона, дар замони Истиқлолияти давлатӣ фарҳанги миллӣ рушд ёфт.
- Мавриди зикри хос аст, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ибтидои фаъолияти сиёсиашон ба фарҳанг ва рушду нумӯи он аҳамияти махсус медиҳанд. Ба таъбири дигар, ин абармард кори давлатдории худро бо фарҳанг оғоз карданд. Пас мо, муҳаққиқони соҳаи фарҳангро зарур аст, ки дар партави сиёсати фарҳангпарваронаи Президенти кишвар Эмомалӣ Раҳмон ҷанбаъҳои гуногуни онро мавриди баррасӣ қарор диҳем. Мо бояд вазъияти имрӯзаи фарҳанги маънавӣ дар Тоҷикистонро мавриди таҳқиқ қарор дода, рушди босуботи онро дар оянда муайяну мушаххас намоем, - иброз дошт Х. Идиев.
Дар, воқеъ, фарҳанги волою ғании мо на танҳо боиси ифтихор аст, балки ганҷинаи беназирест, ки тӯли қарнҳо ҳамчун заминаи боэътимод боиси рушду нумӯи тамаддун ва фарҳангҳои мухталифи ҷаҳон гардидааст. Ҳифзу нигаҳдошт ва дар оянда тавсеаи он вазифаи асосии мутахассисони соҳа мебошад.
М. ЧУРҒОСИЕВ,
мудири шуъбаи магистратура ва аспирантураи Донишкадаи давлатии фарҳанг ва санъати Тоҷикистон ба номи Мирзо Турсунзода
Баёни ақида (0) Санаи нашр: 24.12.2018 №: 253-254 Мутолиа карданд: 1002
