маориф
МАОРИФ. ҲАМҚАДАМИ ЗАМОНА БОШЕМ!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи маорифро асоси таҳкими аркони давлат ва наҷоти миллат унвон карда, онро яке аз самтҳои афзалиятноки сиёсати иҷтимоӣ қарор додаанд.
Ҳамин аст, ки Сарвари давлат аз оғози фаъолияти пурсамарашон ин соҳаро нисбат ба дигар соҳаҳо афзал дониста, онро таҳти назорат ва таваҷҷуҳи махсуси Ҳукумати ҷумҳурӣ қарор доданд. Ба хотири пешрафти соҳа тӯли солҳои соҳибистиқлолӣ силсилаи қонунҳо ва дигар санадҳои меъёрии ҳуқуқӣ, аз қабили қонунҳои Ҷумҳурии Тоҷикистон «Дар бораи маориф», «Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ» ва чандин консепсия ва барномаҳои давлатӣ таҳия ва қабул гардиданд. Албатта, ин ҳама, тайи солҳои сипаришуда дар раванди таълиму таҳсил нақши бориз гузошта, боиси такмилу рушди соҳа гардиданд. Алалхусус, ба сифати таълиму тарбия дар муассисаҳои томактабӣ, ки зинаи нахустини таҳсилот маҳсуб меёбанд, аҳамияти махсус дода шуд. «Барномаи давлатии рушди соҳаи томактабӣ дар Ҷумҳурии Тоҷикистон барои солҳои 2006 - 2010» қабул гардид. Зимни амалӣ намудани барномаи мазкур ҳифзи ҳуқуқи кӯдак мустаҳкам, шаклу усулҳои тарбияи томактабӣ муайян, заминаи моддӣ - техникӣ ва таълимию методии ҳамаи муассисаҳо беҳтар гардонда шуд.
Барои рушд ва тавсеаи соҳаи маориф дар кишвар ҳамасола бо дастгирӣ ва ғамхории Ҳукумати мамлакат беш аз пеш маблағи муайян ҷудо мегардад. Аз ҷумла, соли 2000 ба соҳаи маориф аз Буҷети давлатӣ 42 миллион сомонӣ ҷудо шуда бошад, пас ин рақам дар соли 2015 ба се миллиард сомонӣ расид. Дар давоми ин солҳо дар кишвар шумораи муассисаҳои таҳсилоти миёнаи умумӣ бамаротиб афзуда, теъдоди онҳо ҳоло ба беш аз 4000 расидааст. Дар ин давра, шумораи донишгоҳу донишкадаҳо низ зиёд гардид, ки дар онҳо бештар аз 150 ҳазор донишҷӯ таҳсил менамояд. Дастурҳои дигари Президенти мамлакат дар паёмҳои худ андешидани тадбирҳои иловагӣ барои омӯзиши илмҳои муосир ва забонҳои хориҷӣ мебошад. Дар замоне, ки вазъи сиёсии ҷаҳон бисёр мураккаб шудааст, иҷро ва амалӣ намудани ин дастурҳову тадбирҳо бениҳоят муҳим арзёбӣ мегарданд. Дар ҳақиқат, моро зарур аст, ки бо шинохти масъулият беҳтару бештар заҳмат кашем. Барои ин, Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ беҳтарин раҳнамои мо - омӯзгорон маҳсуб мешавад.
Шаҳноза АБИБУЛЛОЕВА,
омӯзгори МТМУ № 15 - и ноҳияи Шоҳмансури шаҳри Душанбе
Баёни ақида (0) Санаи нашр: 24.12.2018 №: 253-254 Мутолиа карданд: 968
