иқтисод
НОҲИЯИ ТЕМУРМАЛИК. АФЗОИШИ ДАСТОВАРДҲО САМАРИ ТАЛОШҲОЯНД
Ноҳияи Темурмалик дар давраи соҳибистиқлолӣ бо дастгирии Ҳукумати кишвар ва меҳнати содиқонаи сокинони заҳматпешааш рушду нумӯ карда, имрӯз ба яке аз мавзеъҳои ободу зебо ва сарсабзу хуррами кишвари азизамон табдил ёфтааст. Мақомоти иҷроияи маҳаллии ҳокимияти давлатӣ ва мардуми сарбаланди ноҳия тамоми иқтидору имкониятҳоро баҳри амалӣ кардани супоришу ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон равона сохта, дар ҳамаи бахшҳои хоҷагидорӣ ба дастовардҳои чашмрас ноил гардиданд.
Тавре раиси ноҳия Эмомиддин Аслзода ҳангоми суҳбат иброз дошт, то якуми декабри соли ҷорӣ нақшаи даромади ноҳия 98 дарсад иҷро гашта, ба буҷети маҳаллӣ наздики 31 миллион сомонӣ ворид шуд.
Ҳаҷми истеҳсоли маҳсулоти саноатӣ сол ба сол меафзояд ва, аз ҷумла, тайи ёздаҳ моҳи соли равон тавлидоти маҳсулоти саноатӣ 10 миллиону 779 ҳазор сомониро ташкил дод, ки нисбат ба ҳамин давраи соли гузашта 2 миллион сомонӣ зиёд мебошад.
Роҳбарияти ноҳия ҷиҳати рушди соҳаи кишоварзӣ, баланд бардоштани ҳосилнокӣ ва зиёд намудани тавлидоти маҳсулот тадбирҳои зарурӣ меандешад. Тавре раиси ноҳия иттилоъ дод, кишоварзони ноҳия дар ёздаҳ моҳи соли ҷорӣ ҳаҷми истеҳсоли маҳсулоти кишоварзиро ба 260 миллиону 337 ҳазор сомонӣ расонданд, ки нисбат ба ҳамин давраи соли сипаришуда 5 миллиону 961,2 ҳазор сомонӣ зиёд аст.
Дар ноҳия ба ривоҷу равнақи боғдорӣ диққати ҷиддӣ дода мешавад ва соли ҷорӣ 51 гектар боғи нав бунёд ёфта, майдони боғу токзори ноҳия ба 1218 гектар расонда шуд, ки барои афзоиши меваҷот мусоидат хоҳад намуд.
Ҳоло бо кумаку дастгирии мақомоти иҷроияи маҳаллии ҳокимияти давлатии ноҳия дар ҳамкорӣ бо кормандони ташкилоту муассисаҳо, тариқи ҳашарҳои дастаҷамъона дар соҳили дарёи Сурхоб корҳои соҳилмустаҳкамкунӣ ва сохтани саддҳои муҳофизатӣ бо суръат идома дорад.
Ғайр аз ин, барои нигоҳдорию таъмири роҳҳо, кабудизоркунӣ ва зимистонгузаронӣ масъулони ноҳия чораҳои саривақтӣ андешида, бо ин мақсад 553 ҳазору 900 сомонӣ ҷудо гардидааст.
Ба кор таъмин намудани сокинон дар меҳвари таваҷҷуҳи ҳамешагии масъулони ноҳия қарор дошта, дар ин самт низ тадбирҳои муҳим амалӣ мешаванд. Бо ин мақсад тайи моҳҳои сипаришуда 336 ҷойи нави корӣ таъсис ёфта, 230 нафар ба омӯзиши касбу ҳунарҳои гулдӯзӣ, зардӯзӣ, қуроқдӯзӣ, тоқидӯзӣ, қолинбофӣ ва дӯхтани либосҳои милливу мактабӣ ҷалб гардиданд.
Ин ва далелҳои дигари эътимодбахш шаҳодат медиҳанд, ки аз он дастоварду комёбиҳои мардуми заҳматпешаи ноҳияи Темурмалик сол ба сол афзуда, баҳри пешрафту тараққиёти ноҳия заминаи мусоид фароҳам меорад. Масъулону сокинони ноҳия бошанд, ҷиҳати роҳандозии иқдомоти наву созанда камари ҳиммат бастаанд.
Комрон САФАР,
Бахтовар КАРИМ,
“Ҷумҳурият”
Баёни ақида (0) Санаи нашр: 27.12.2018 №: 257-258 Мутолиа карданд: 826
