маориф
ЗАБОНДОНӢ. САТҲИ ДОНИШИ ҶАВОНОНРО БАЛАНД БАРДОРЕМ!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатии хеш ба Маҷлиси Олии Ҷумҳурии Тоҷикистон омӯзиши забонҳои англисӣ ва русиро муҳим арзёбӣ карда, равона намудани таваҷҷуҳро ба ин самти фаъолият зарур ҳисобиданд.
Воқеан ҳам, тавре аз Паём бармеояд, дар самти татбиқи «Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон”, ки ҳанӯз соли 2003 аз ҷониби Ҳукумати Ҷумҳурии Тоҷикистон ба тасвиб расида буд, он қадар ҳам қонеъкунанда нест. Ин ҳолатро дар муассисаҳои таълимии вилояти Суғд низ мушоҳида кардан мумкин аст. Ҷиҳати ислоҳи ин вазъият раёсати маорифи вилоят тадбирҳои мушаххасро рӯи кор овард. Аз ҷумла, дар соли таҳсили 2018 - 2019 дар 928 муассисаи таълимии вилоят 3237 нафар омӯзгори фанни забони русӣ ва 2840 нафар омӯзгори фанни забони англисӣ фаъолият доранд, ки нисбат ба соли таҳсили гузашта 114 нафар омӯзгори фанни забони русӣ ва 54 нафар омӯзгори фанни забони англисӣ зиёд мебошад.
Соли 2018 тибқи роҳхати Вазорати маориф ва илми Ҷумҳурии Тоҷикистон 141 нафар хатмкардаи мактабҳои олӣ аз фанни забони русӣ ва 166 нафар аз фанни забони англисӣ ба муассисаҳои таълимии шаҳру ноҳияҳои вилоят ба кор фиристода шуданд. 93 нафар аз фанни забони русӣ ва 97 нафар аз фанни забони англисӣ мутахассисони ҷавон ба ҷойи кор ҳозир шуданд. Инчунин, баҳри такмили ҷараёни таълими забонҳои русӣ ва англисӣ дар муассисаҳои таълимӣ 45 кабинети махсус амал мекунад. Вале, ин ҳама тадбирҳои роҳандозишуда ҳанӯз моро қаноатманд намекунанд.
Ба вазъи омӯзиши забонҳои хориҷӣ баҳои воқеъбинона додани Сарвари давлат моро водор мекунад, ки ба ин масъала бештар эътибор диҳем. Дар партави ҳидояти Пешвои миллат кӯшиш ба кор мебарем, ки сатҳу сифати таълими забони русӣ ва англисиро ба дараҷаи баландтар бардорем. Барои ин шароитҳои мусоиди таълимӣ, пойгоҳи муқтадири таълимие, ки бо таваҷҷуҳ ва дастгирии Президенти Ҷумҳурии Тоҷикистон муҳтарам Эмомалӣ Раҳмон фароҳам омадаанд, мавҷуданд. Танҳо саъю талош ва азму ғайрати дучанд лозим аст, ки ҳидоятҳои Пешвои миллат иҷрои саривақтии худро ёбанд.
Осим КАРИМЗОДА,
сардори раёсати маорифи вилояти Суғд
Баёни ақида (0) Санаи нашр: 28.12.2018 №: 259 Мутолиа карданд: 980
