маориф
ИЛМ - МУҲИМТАРИН ОМИЛИ РУШД
Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 26 декабри соли 2018 зимни ироаи Паёми навбатӣ ба Маҷлиси Олӣ иброз доштанд: «Таҳким бахшидани иқтидори илмии кишвар, устувор гардондани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини соҳаҳои илму маориф мебошад».
Пешвои миллат таваҷҷуҳи аҳли маорифро пеш аз ҳама ба масъалаи афзалияти бештар додан ба таълиму тарбия, баланд бардоштани сифати он дар тамоми зинаҳои таҳсилот, истифодаи тамоми имкониятҳо дар таълиму тарбияи насли наврас, таҳкими заминаи моддиву техникии муассисаҳои таълимӣ ва самаранокии фаъолияти онҳо ҷалб намуданд.
Зикр гашт, ки имрӯз давлату Ҳукумати кишвар барои омӯзгорон шароити хуби корӣ муҳаё намудааст. Танҳо омӯзгоронро мебояд, барои баланд бардоштани сифати таълиму тарбия саъй намоянд, то ин ки шогирдон ҳамчун мутахассисони забондон ва ҷавобгӯйи талаботи замони муосир ба камол расанд.
Дастгирии соҳаи маориф ва баланд бардоштани мақоми омӯзгор, дар навбати аввал, аз он ҷиҳат муҳим мебошад, ки аҳли маориф дар рушди неруи инсонӣ саҳми бевосита дошта, яке аз қувваҳои пешбаранда ва фаъоли ҷомеаи имрӯза ба шумор меравад ва гузашта аз ин, пешрафти тамоми соҳаҳои ҳаёти ҷомеа ва давлат ба сатҳи рушди маориф вобастагӣ дорад.
Дастурҳои дигари Президенти мамлакат дар Паём андешидани тадбирҳои иловагӣ барои омӯзиши илмҳои муосир ва забонҳои хориҷӣ мебошад.
Мо - омӯзгоронро лозим аст, ки Паёми Пешвои миллат муҳтарам Эмомалӣ Раҳмонро сармашқи кори худ намуда, ба масъалаи таълиму тарбияи насли наврас афзалият диҳем ва сатҳу сифати таълимро хуб ба роҳ монем. Бигзор, шогирдони мо бо фарогирии илмҳои муосир ва азхудкунии забонҳои хориҷӣ баҳри баланд бардоштани обрӯю нуфузи кишвар ва муаррифии шоистаи он саҳмгузор бошанд.
Маҳбуба МУРОДОВА,
омӯзгори МТМУ № 15 - и ноҳияи Шоҳмансур
Баёни ақида (0) Санаи нашр: 02.01.2019 №: 1 Мутолиа карданд: 987