маориф
ДИЛБАР ШОЕВА – ОМӮЗГОРИ СОЛ
Дар даври ниҳоии озмуни “Омӯзгори соли Тоҷикистон - 2018” Дилбар Шоева, омӯзгори гимназияи № 74 - и шаҳри Душанбе пирӯз гардид. Ғолиби озмун бо диплом, мукофоти пулӣ ба маблағи 4000 сомонӣ ва нишони сарисинагии “Аълочии маориф ва илми Тоҷикистон” қадр гардид.
Дар озмуни мазкур 5 нафар: Мунира Куканбекова, омӯзгори фанни забон ва адабиёти тоҷики муассисаи таҳсилоти миёнаи умумии № 5 - и шаҳри Хоруғ, Бахтовар Ҳукумов, омӯзгори фанни математикаи литсейи давлатии № 1 - и шаҳри Бохтар, Муродҷон Ҳайдаров, омӯзгори фанни таърих ва ҳуқуқи муассисаи таҳсилоти миёнаи умумии № 49 - и ноҳияи Бобоҷон Ғафуров, Дилбар Шоева, омӯзгори фанни таърихи гимназияи № 74 - и шаҳри Душанбе ва Ҷонибек Сафаров, омӯзгори фанни технологияи иттилоотии муассисаи таҳсилоти миёнаи умумии № 44 - и ноҳияи Варзоб иштирок намуда, дар 7 самт ҳунару маҳорати худро санҷиданд.
Маросими ҷамъбасти озмун дар Вазорати маориф ва илми Ҷумҳурии Тоҷикистон бо иштироки муовинони вазири маориф ва илм Раҳматулло Мирбобоев ва Латофат Назирӣ, аъзои кумитаи тадорукот, ҳакамон, рӯзноманигорон, иштироккунандагони озмун ва намояндагони соҳаи маориф аз шаҳру ноҳияҳои кишвар сурат гирифт.
Ғолиби озмун андешаҳояшро чунин изҳор дошт: “Вақте кас мақсад мегузораду барои расидан ба он азму талош мекунад, ҳамин, аллакай, музаффарият аст. Ҷодаи камолоти инсон сарҳад надорад. Тазаккур медиҳам, ки пирӯзии ман дар ин озмун пирӯзии устодону ҳампешагонам ва таваҷҷуҳи пайвастаи Ҳукумату давлат, махсусан Пешвои миллат муҳтарам Эмомалӣ Раҳмон ба маориф ва ҷойгоҳи муаллим аст”.
Инчунин, тамоми иштирокчиёни озмун бо нишони сарисинагии “Аълочии маориф ва илми Тоҷикистон” ва туҳфаҳои таъсиснамудаи вазорат ва иттифоқҳои касабаи кормандони соҳа қадр шуданд.
Бузургмеҳри БАҲОДУР, “Ҷумҳурият”
Баёни ақида (0) Санаи нашр: 03.01.2019 №: 2 Мутолиа карданд: 1107
