иқтисод
СОҲИБКОРӢ ВА НАҚШИ ТАШКИЛОТҲОИ МОЛИЯВИЮ ҚАРЗӢ ДАР РУШДИ ОН
Беҳтар намудани низоми бонкии кишвар яке аз масъалаҳои муҳимтаринест, ки дар Паёми нави Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зикр ёфт. Тавре Президенти мамлакат таъкид доштанд, низоми бонкӣ дар роҳи таъмин намудани рушди иҷтимоиву иқтисодии кишвар, бахусус пешрафти соҳаҳои воқеии иқтисодиёт, баланд бардоштани иқтидори содиротии ҷумҳурӣ, таъсиси ҷойҳои нави кор ва пайдо кардани манбаъҳои иловагии даромади Буҷети давлатӣ нақши муҳим мебозад.
Давоми 11 моҳи соли гузашта аз ҷониби бонкҳои кишвар ба соҳибкорон ва аҳолӣ 7 миллиарду 250 миллион сомонӣ қарз дода шудааст, ки нисбат ба ҳамин давраи соли пешӣ 201 миллион сомонӣ ё 3 дарсад зиёд мебошад. Дар натиҷаи тадбирҳои амалинамудаи Ҳукумати мамлакат барои дастрасии соҳибкорон ба манбаъҳои молиявии арзон давоми се соли охир ҳиссаи соҳаи саноат дар маҷмӯи маҳсулоти дохилӣ аз 15,2 то 17,3 дарсад афзоиш ёфт. Илова ба ин, барои зиёд намудани ҳаҷми қарз ба бахши хусусӣ, бавижа соҳаҳои истеҳсолӣ, нигоҳ доштани суботи низоми бонкӣ, беҳтар гардондани сатҳу сифати хизматрасониҳо, омода кардани мутахассисони бахши бонкдорӣ ва баланд бардоштани малакаи касбии кормандон ба сохторҳои дахлдор аз ҷониби Сарвари давлат дастурҳои мушаххас дода шуданд. Аз ин бармеояд, ки фаъолияти бонкҳо ҳамчун омили рушди иқтисоди кишвар дар меҳвари таваҷҷуҳи давлату Ҳукумат қарор гирифта, пайваста дар ин самт тадбирҳои судманд андешида мешаванд, зеро фаъолияти дурусти ташкилотҳои молиявию қарзӣ пешрафти соҳибкориро таъмин хоҳанд намуд.
Бахтиёр ҚУРБОНОВ,
донишҷӯи факултети молия ва қарзи ДДМИТ
Баёни ақида (0) Санаи нашр: 03.01.2019 №: 2 Мутолиа карданд: 1108
