ҳуқуқ
ҶИНОЯТ ВА ҶАЗО
ОДАМКУШӢ
Сокини ноҳияи Мастчоҳ қурбони моҷаро шуд
Дар ноҳияи Мастчоҳ нафаре, ки мехост аз моҷарои ду тараф пешгирӣ намуда, онҳоро аз ҷанҷол боздорад, бо зарби корд сахт маҷрӯҳ шуд ва дар беморхона ба ҳалокат расид.
Бино ба иттилои маркази матбуоти Вазорати корҳои дохилӣ, ҳодиса 3 январи соли ҷорӣ ба амал омада, Ниёзмаҳмад Алиназаров, сокини деҳаи Табушни ноҳияи Мастчоҳ, саркардаи ин моҷарои марговар дониста мешавад. Чунончи, номбурда шоми ҳамон рӯз дар ҳолати мастӣ ба мағозаи «Пайрав», воқеъ дар Ҷамоати деҳоти Палдораки ноҳияи Мастчоҳ бо шаҳрвандон Мурод Ҳайдаров ва Муҳаммадҷон Усмонов вориди баҳси лафзӣ шуда, онҳоро дашном медиҳад. Баҳси бамиёномада дар саҳни МТМУ №28 - и деҳа низ идома карда, зимни он яке аз иштирокчиёни дигари ҳодиса ҷияни Н. Алиназаров - Абдувосит Алиназарзода аз ҷониби М. Усмонов латукӯб мешавад.
Баъдан, А. Алиназарзода ба хонааш рафта, бо корд мусаллаҳ ва бо ҳамроҳии амакаш Абдулқудус Алиназаров ба кӯча мебарояд. Онҳо дар назди беморхонаи деҳаи Табушн бо Сиёвуш Абдуллобеки Усмониён вохӯрда, бо зарби корд ба ӯ ҷароҳати ҷисмонӣ мерасонанд. Дар ҳамин асно М. Ҳайдаров, шаҳрванди дигар, ки мехост ин моҷароро пешгирӣ кунад, ба қафаси синааш корд хӯрд ва бар асари он дар беморхона ҷон дод.
Ба навиштаи манбаъ, ҳоло нисбат ба А. Алиназаров бо моддаи 32 қисми 3 ва 104 қисми 2, А. Алиназарзода бо моддаи 237 қисми 3, Н. Алиназаров ва М. Усмонов бо моддаи 237 қисми 2 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, тафтишот идома дорад.
БОЗДОШТИ ЯҒМОГАРОНИ МАНЗИЛҲОИ ИСТИҚОМАТӢ
Кормандони милитсияи ноҳияи Шоҳмансури шаҳри Душанбе гурӯҳи ҷиноятпешаеро боздошт намуданд, ки дар содир намудани 15 ҳолати дуздӣ гумонбар дониста мешаванд.
Тибқи итттилои сомонаи ВКД, ин гурӯҳ аз манзилҳои истиқоматии сокинони шаҳри Душанбе, маблағҳои пулӣ, ҷавоҳирот ва телефонҳои мобилию дигар ашёи гаронарзишро дуздида, бо ин амал ба шаҳрвандон беш аз 200 ҳазор сомонӣ зарар расондаанд.
Зимни пешбурди корҳои тафтишотӣ муайян гардид, ки гумонбарон - Фирдавс Ҳукуматов, Маҳмадалӣ Наимов ва Кароматулло Қурбонов бо таъсиси гурӯҳи ҷиноятӣ шабона манзилҳои истиқоматии шаҳрвандонро мавриди дуздӣ қарор додаанд.
Айни ҳол, нисбат ба ин ҳодиса бо моддаи 244 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, гумонбарон дар ҳабси пешакӣ қарор доранд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 09.01.2019 №: 8 Мутолиа карданд: 871
