иқтисод
ЛАХШ. БОҒҲО НИШОНИ ОБОДИАНД
Боғдорӣ, ки яке аз сарчашмаҳои асосии таъмини амнияти ғизоии аҳолӣ, манбаи ашёи хоми корхонаҳои ватанӣ ва таъсиси ҷойҳои нави кор дар минтақаҳои кӯҳии мамлакат мебошад, дар ноҳияи Лахш ба таври назаррас рушд меёбад. Вобаста ба иқлими минтақа дар ин ҷо, махсусан, парвариши дарахтони меваҳои тухмдор самараи хуб медиҳад.
Мушоҳидаҳо нишон медиҳанд, ки таваҷҷуҳи соҳибкорони маҳаллӣ ба бунёди корхонаҳои муҷаҳҳаз бо технологияҳои муосири коркарди меваю сабзавот ва истеҳсоли маҳсулоти ниҳоӣ, зиёд намудани масоҳати гармхонаҳо, сохтмони марказҳои логистикӣ, инчунин, сардхонаҳои ҳозиразамон барои нигоҳдории меваю сабзавот зиёдтар мешавад.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи рушди соҳаи кишоварзӣ таваҷҷуҳи махсус зоҳир намуда, дар Паёми навбатии хеш изҳор доштанд: «Ҳадафи стратегии дигар, ки ба таъсиси ҷойҳои корӣ ва афзун гардондани иқтидори содиротии кишвар таъсири бевосита мерасонад, ҳифзи амнияти озуқаворӣ тавассути рушди соҳаи кишоварзӣ мебошад».
Сокинони ноҳия баробари картошкапарварию чорводорӣ ба боғдорӣ машғуланд. Шароити табиию иқлимии ноҳия барои парвариши себу нок бештар мусоид аст. Хоку иқлими мусоиди минтақа ва заминҳои лалмии он имконият медиҳанд, ки майдони боғҳои нав зиёд карда шавад. Тибқи нақша, давоми 5 соли оянда дар ҳудуди ноҳия бунёд намудани 300 гектар боғи нав дар назар аст. Мувофиқи маълумоти оморӣ, соли гузашта дар ҳудуди ноҳия 60 гектар боғ бунёд шуда, масоҳати умумии он қариб ба 2 ҳазор гектар расид.
Дар натиҷаи зиёд шудани майдони боғҳо ва беҳтар гардидани вазъи обёрии онҳо дар ноҳия истеҳсоли мева афзуда, ба арзонии нархи он мусоидат намудааст. Кишоварзон низ аз ҳисоби ҳосили баланд даромади хуб мегиранд.
Ҳарчанд масоҳати майдони боғҳо пайваста зиёд мешавад, барои истифодаи шароитҳои васеи табиию иқлимии ноҳия ҷалби маблағҳои имтиёзнок, грантҳо ва қарзҳои камфоиз дар самти ташкили боғзорҳо зарур аст. Дар чунин ҳолат бунёди боғҳои нав аз ҳисоби заминҳои доманакӯҳ ва талу теппаҳо бештар сурат хоҳад гирифт. Ба ин васила дар деҳоти дурдасти ноҳия ҷойҳои нави кор фароҳам меоянд. Ҳамчунин, таъсиси корхонаҳои фурӯш, захира ва коркарди мева дар ноҳия амали саривақтӣ ва рӯзмарра мебошад.
Гулафзо САЛИМОВА,
корманди Институти иқтисодиёти кишоварзии АИКТ
Баёни ақида (0) Санаи нашр: 14.01.2019 №: 11 Мутолиа карданд: 804
