фарҳанг
11 ПАТЕНТ ДАР ЯК СОЛ
- Олимони тоҷик дар соли 2018 11 патенти Ҷумҳурии Тоҷикистон, 1 патенти ИМА, 3 қарори мусбат оид ба гирифтани патент ба даст оварданд. Соли гузашта барои дар истеҳсолот ҷорӣ намудан 15 дастоварди намоёни олимон пешҳод гардид, - зикр шуд дар маҷлиси умумии солонаи Академияи илмҳои Ҷумҳурии Тоҷикистон.
Фарҳод Раҳимӣ, президенти Академияи илмҳои Ҷумҳурии Тоҷикистон, оид ба натиҷаҳои асосии фаъолияти илмӣ ва илмиву ташкилии академия дар соли 2018 ва вазифаҳо барои соли 2019 сухан намуда, аз ҷумла гуфт: «Таваҷҷуҳи олимон ба таҳқиқу омӯзиши масъалаҳои илмию техникии самтҳои афзалиятнок, ки барои кишвар хеле муҳиманд, аз ҷумла гидроэнергетика, истифодаи захираҳои об ва манбаъҳои дигари аз нигоҳи экологӣ тозаи барқароршавандаи энергия, коркарди технологияҳои нав, мониторинги ҳолати сейсмологӣ, коркарди ҳолатҳои пешгӯӣ намудани заминларза, таҳқиқӣ комплекси гуногуншаклии биологии флора ва фауна, генофонд ва захираҳои биологии Тоҷикисон, инчунин, масъалаҳои муҳими таърих, забон, адабиёт равона гардида, натиҷаҳои хуби илмӣ ба даст оварданд».
Зикр гардид, ки маҳз ба хотири чунин натиҷаҳои хуби илмиашон як гурӯҳ олимон аз ҷониби Ҳукумати кишвар ва кишварҳои хориҷӣ бо ҷоизаву медалҳо қадр шуданд. Аз ҷумла, академиҳо Т. Назаров бо ордени «Тулӯи офтоб, дараҷаи 1» - и Ҷопон, М. Илолов бо медали «Исаак Нютон»-и Консорсиуми илмии саноати Аврупо, Р. Маърупов бо ордени «Дӯстлик» - и Ҷумҳурии Ӯзбекистон, К. Абдулманнонов бо медали «Академик Н. Вавилов» - и Академияи илмҳои табиатшиносии Россия қадр гардиданд.
Ҳамчунин, академик М. Яқубова Ҷоизаи давлатии Ҷумҳурии Тоҷикистон ба номи Абуалӣ ибни Сино дар соҳаи илм ва техникаро соҳиб шуд.
Дар маҷлис, ҳамчунин, таъкид гардид, ки соли 2018 дар асоси омӯзиш ва таҳқиқи чандинсолаи гиёҳҳои шифобахши кишвар, китоби «Атласи гиёҳҳои шифобахши Тоҷикистон» таҳия ва ба чоп омода шуд, ки он соли 2019 дастраси ҳамагон мегардад.
Фарзона ФАЙЗАЛӢ,
«Ҷумҳурият»
Баёни ақида (0) Санаи нашр: 14.01.2019 №: 11 Мутолиа карданд: 853
