фарҳанг
ЁДИ НАВИСАНДАРО ГИРОМӢ ДОРЕМ
Аброр Зоҳир чун нависанда дар охири солҳои 80 - уми асри гузашта зуҳур кард. Аввалин асарҳояш дар рӯзномаҳо ва маҷаллаи "Садои Шарқ” дарҷ мегардиданд. Номбурда ба кори эҷодӣ ҷиддӣ пардохта, дар даврони соҳибистиқлолӣ чун нависанда шинохта шуд. Дар мавзӯъҳои мухталиф асарҳои зиёде навишт. Муаллифи зиёда аз 50 роман ва чандин повесту ҳикояҳо мебошад.
Романҳои "Душанбе” "Нуқтаи нафс”, "Бозгашт” "Майдон”, "Мунтасир”, "Дар ҷилди одам”, "Тулӯъ дар ғуруб”, "Ибни Лодан”, "Дунёи бесомон”, "Муҷассамаи ишқ”, "Мотами гурбаи сиёҳ”, "Дар ҷустуҷӯйи инсон”, "Коммунист”, "Арсаи набарди гургон”, ”Ману туву фаришта”, "Муқовимат”, "Ёри ғор”, "Ҷомӣ”, "Таърихи беморӣ” ва повестҳои "Мусофири ҷодаи ишқ”, "Барзак”, "Дуроҳа”, "Моҷарои қабр”, "Таносух”, "Васваса”, "Пастиву баландӣ”, "Мусофири ҷодаи ишқ” маҳсули қалами ӯ мебошанд. Ҳамчунин, Аброр Зоҳир муаллифи чандин филмнома мебошад, ки ағлаби онҳо тариқи киностудияи "Тоҷикфилм”, ТВ "Сафина” ва шабакаи «Тоҷикистон» намоиш дода шудааст.
Аброр Зоҳир адиби зодаи замони истиқлол аст. На ба маънои он ки аксари асарҳои беҳтаринашро дар ин давра офаридааст, балки ба он маънӣ, ки дар асарҳояш бурду бохти замони муосирро бо тамоми ҷузъиёташ инъикос намудааст. Бавижа, масъалаи бедории ҳофизаи таърихӣ дар меҳвари эҷодиёти адиб чарх мезанад.
Романи «Ибни Лодан» - и адиб дар кишвари мо аз назари мавзӯъ тоза буда, масъалаи доғи ҷомеаи ҷаҳонӣ – терроризму экстремизмро баррасӣ мекунад. Нависанда тавассути образи роҳбари ҳаракати террористию экстремистии «Ал - қоида» Усома бини Лодан тамоми масоили террору ифротгароиро аз муҳокимаи бадеӣ мегузаронад ва ҳушдор медиҳад, ки ин офат агар пешгирӣ нашавад, ҷаҳонро фаро мегирад. Воқеан ҳам, баъди чанд соли офаридани асар, давлате бо номи исломӣ зуҳур кард ва ба харобии Сурия ва марги ҳазорон нафар сабаб гардид.
Нуктаи муҳим ин аст, ки осори Аброр Зоҳир то ҳол ба таври пурра таҳқиқ нашудааст. Тақризҳои алоҳидаи ба асарҳояш навишташуда ва зикри мавзӯю муҳтавои онҳо дар маводи хулосавии адабиётшиносӣ ҳоло маънии дарк ва баҳои дурусти илмӣ гирифтани осори нависандаро надорад.
Дар чанд соли охири умраш дардманд буд, вале рӯҳан бо дард мубориза ва ҳамвора кори эҷодиро низ пеш мебурд.
Бузургмеҳр БАҲОДУР,
«Ҷумҳурият»
Баёни ақида (0) Санаи нашр: 16.01.2019 №: 13 Мутолиа карданд: 940
