ҳуқуқ
РОҲЗАНӢ БА МАБЛАҒИ ҚАРИБ 600 000 СОМОНӢ
20 январи соли 2019 ба қисми навбатдории раёсати ВКД дар шаҳри Душанбе оид ба сар задани ҷинояти вазнини роҳзанӣ дар кӯчаи Рӯҳафзои ноҳияи Фирдавсӣ хабари фаврӣ ворид шуд. Баҳри ошкору муайян намудани ҷинояти мазкур аз ҳисоби кормандони ботаҷрибаи милитсияи пойтахт гурӯҳи фаврӣ - тафтишотӣ дарҳол ба ҷои ҳодиса рафт.
Баъди пурсиши ҷабрдидагон муайян гардид, ки шахсони ниқобпӯш ба манзили истиқоматии шаҳрванд Ахмедов Абдулҳамид, соли таваллудаш 1983, ронандаи ширкати «Рахш таксӣ», ғайриқонунӣ ворид шуда, ҳамсар ва 3 нафар фарзанди ноболиғашро бо корд таҳдид ва бо скотч дасту даҳонашонро баста, маблағҳои пуливу як миқдор ҷавоҳироти тиллоии номбурдаро тасарруф намуда, аз ҷои ҳодиса ғайб задаанд.
Тибқи иттилои дафтари матбуоти ВКД, дар натиҷаи гузарондани чорабиниҳои тафтишотӣ маълум гашт, ки ҷинояти мазкурро на шахсони бегона, балки домоди хонадон, нафаре, ки бевосита бо ин оила муносибати хешутаборӣ ва рафтуомад дорад, шаҳрванд Тоҷиддин Ғафуров, соли таваллудаш 1979, истиқоматкунандаи шаҳри Душанбе, тарҳрезӣ ва бо ҳаммаслакони худ – Далер Яъқубов ва Шуҳратҷон Ҳанифов, сокинони пойтахт содир намудаанд.
Бино ба маълумоти тафтишоти пешакӣ Т. Ғафуров бо сабаби хусумати шахсӣ нисбат ба додарарӯсаш як сол пеш нақшаи ин ҷиноятро тарҳрезӣ намуда, шаби 20 январ ба манзили истиқоматии ҷабрдида ворид гардида, 21 300 доллари ИМА, 75 000 рубли ФР, 79 000 сомонӣ ва як миқдор ҷавоҳироти тиллоиро ба маблағи умумии 299 600 сомонӣ ба яғмо бурдаанд.
Баъд аз дастгир гардидан аз номбурдагон як миқдор маблағҳо ва ҷавоҳироти тиллоии рабудашуда, инчунин, ба ҳайси далели шайъӣ дастпӯшу скотч ва дигар ашёҳои дар содир гаштани ҷиноят истифодашуда, дарёфту мусодира карда шуданд.
Айни замон номбурдагон дар ҳабси пешакӣ қарор дошта, нисбаташон бо моддаи 249 Кодекси ҷиноятии Ҷумҳурии Тоҷикистон (роҳзанӣ) парвандаи ҷиноятӣ оғоз карда шудааст.
М. БАҲРОМ, «Ҷумҳурият»
Баёни ақида (0) Санаи нашр: 04.02.2019 №: 26 Мутолиа карданд: 847
