ҳуқуқ
ВМКБ. 182 ҶИНОЯТИ КОРРУПСИОНӢ ОШКОР ГАРДИД
Соли 2018 аз ҷониби раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар Вилояти Мухтори Кӯҳистони Бадахшон беш аз 4 миллион сомонӣ зарари молиявӣ ошкор гардида, аз ин ҳисоб 1,6 миллион сомонӣ ба Буҷети давлатӣ барқарор шуд.
Ба гуфтаи Азамат Наврӯззода, сардори раёсати агентӣ, таҳлил ва омӯзиши содиршавии ҷиноятҳои коррупсионӣ ва иқтисодии хусусияти коррупсионидошта нишон медиҳад, ки дар ин давра 182 ҷиноят ошкор гардид. Аз ин шумора 37 ҷинояти асосӣ, 103 иловагӣ ва 42 ҳолат бе оғози парвандаи ҷиноятӣ мебошанд. Ҷиноятҳои вазнин бошанд, дар ин давра 26 ҳолат сабт шудааст, ки маблағи умумии зарари ошкоргардида 6,7 миллион сомониро ташкил медиҳад.
Бино ба иттилои сардори раёсат, соли сипаригардида 88 нафар барои содир намудани ҷиноятҳои коррупсионӣ ва иқтисодии хусусияти коррупсионидошта муайян шудаанд, ки аз онҳо 43 шахси мансабдори идораву муассисаҳои давлатӣ, 7 нафар мансабдори ташкилоту ҷамъиятҳо ва 19 нафарро дигар шаҳрвандон ташкил доданд.
Муфаттишони бахши тафтишотии раёсат 71 парвандаи ҷиноятиро мавриди баррасӣ қарор дода, 25 - тои он нисбат ба 27 нафарро ба итмом расонда, 9 - тои он нисбат ба 10 нафарро бо тасдиқи фикри айбдоркунӣ ба суд ирсол карданд.
Соли гузашта, ҳамчунин, 50 ҳуқуқвайронкунии маъмурӣ вобаста ба коррупсия сабт шуда, ҳуқуқвайронкунандагон ба маблағи 51,7 ҳазор сомонӣ ҷарима шуданд.
Дар раёсати агентӣ баррасии арзу муроҷиатҳо тибқи қонун ба роҳ монда шуда, соли сипаришуда 149 муроҷиати шахсони воқеӣ, ҳуқуқӣ ва 1 муроҷиати электронӣ ба қайд гирифта шуда, аз онҳо 142 муроҷиат ҳаллу фасл гардида, 7 - то мавриди баррасӣ қарор доранд.
Раҳмони ГУЛЗОР, “Ҷумҳурият”
Баёни ақида (0) Санаи нашр: 07.02.2019 №: 29 Мутолиа карданд: 926
