ҳуқуқ
КАМБУДИҲО БАРТАРАФ ШУДАНД!
Кормандони шуъбаи бозрасии давлатии автомобилии Раёсати Вазорати корҳои дохилӣ дар шаҳри Душанбе мақолаи «САДАМА. Бемасъулиятӣ моро то куҷо хоҳад бурд!», ки дар рӯзномаи «Ҷумҳурият» (4. 06. 2018, № 110 – 111) нашр гардида буд, мавриди омӯзиш қарор доданд.
Маълум гардид, ки муаллиф Сафаргул Алимова дар матлабаш оид ба мушкилоти гуногуни мавҷудаи нақлиёт дар ҳудуди кӯчаю роҳҳои шаҳри Душанбе, аз ҷумла ба вуқӯъ омадани садамаҳои нақлиётӣ, ки боиси марг ва бардоштани ҷароҳатҳои вазнини пиёдагардон гардидаанд, таҳлил намудааст.
Дар рафти санҷиш муайян гардид, ки дар кӯчаи Бобоҷон Ғафуров аз ҷониби ронандаи автомашинаи тамғаи «Хундай саната» Муъмин Музаффаров садамаи нақлиётӣ рух дода буд. Сабаби он дағалона вайрон намудани талаботи банди 171 (қоидаҳои ҳаракат дар роҳ), яъне риоя нагардидани суръати ҳаракат дар гузаргоҳи пиёдагардии танзимнашавандаи кӯчаи мазкур мебошад.
Баъди азназаргузаронии роҳи минтақаи мазкур, дар кӯчаи Б. Ғафуров гузаргоҳи пиёдагарди танзимнашаванда, баҳисобгирии анбӯҳи шиддатнокии ҳаракати воситаҳои нақлиёт ва нишонаҳои хатҳои уфуқӣ аз нав кашида шуда, аломатҳои роҳи зарурӣ насб карда шуданд. Ба раёсати истифодабарии роҳҳои ноҳияи Сино бошад, амрномаи БДА дода шуд, ки ҷойҳои кандашудаи қисми мошингарди роҳ ва ноҳамвориҳои ҷойдоштаро аз таъмири ҷорӣ бароранд.
Роҳбарияти шуъбаи бозрасии давлатии автомобилии Раёсати Вазорати корҳои дохилӣ дар шаҳри Душанбе ба рӯзномаи «Ҷумҳурият», ки баҳри сари вақт ошкор ва ислоҳи камбудиҳои ҷойдошта ҳамеша матлаб ба табъ мерасонад, изҳори сипос намуда, масъулони шуъбаи марбута кӯшиш ба харҷ медиҳанд, ки баҳри ислоҳи мушкилиҳо дар самти мазкур минбаъд корро пурзӯр намоянд.
Суҳроб ҚУРБОНЗОДА, сардори ШБДА РВКД
Баёни ақида (0) Санаи нашр: 11.02.2019 №: 31 Мутолиа карданд: 868
