маориф
ОМӮЗГОР БОЯД ПЕШОҲАНГИ ҶОМЕА БОШАД
Дар Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳалли ду проблемаи асосӣ: норасоии кадрҳои соҳибкасби омӯзгорӣ ва баланд бардоштани сатҳу сифати таълим ба миён гузошта шуд. Пешвои муаззами миллат иброз доштанд, ки заҳмати устодону омӯзгоронро ҳамеша баланд арзёбӣ мекунанд. Ва мо, воқеан, ғамхориҳояшонро эҳсос менамоем.
Зикри ин нукта, ки танҳо дар соли гузашта 151 муассисаи таҳсилоти миёнаи умумӣ бо зиёда аз 73000 ҷойи нишаст сохта, ба истифода дода шуд, кофист дарёбем барои рушди соҳа чӣ тадбирҳои муҳимро андешиданду амалӣ карданд. Ин ва ислоҳоти низоми ҳамаи зинаҳои таҳсил, ки минбаъд низ идома меёбанд, ба сатҳу сифати таълим таъсири мусбат мерасонанд. Имсол бошад, беш аз 1050 муассисаи таҳсилоти томактабӣ ва умумӣ бунёд мегардад.
Сарвари давлат ниҳодҳои дахлдорро вазифадор намуданд, ки рушди муассисаҳои таълимӣ, аз ҷумла муассисаҳои томактабӣ ва то соли 2021 ба 30 фоиз расондани фарогирии кӯдаконро ба зинаи таҳсилоти томактабӣ таъмин намоянд.
Ҷавобан ба ин ғамхориҳо моро зарур аст, ки бо истифода аз усулҳои пешрафтаи фаъолу нави таълим дар ҳалли масъалаву мушкилоти мавҷуда сари вақт мусоидат бинамоем. Инчунин, ба сифати такмили ихтисоси омӯзгоронамон диққати ҷиддӣ бидиҳем. Пешрафти ҷомеа, тараққиёти илму техника ва технология тақозо дорад, ки барои боло бурдани сатҳи касбиямон бештару беҳтар саъю кӯшиш ба харҷ бидиҳем. Албатта, нобахшиданист, вақте ки омӯзгор аз пешрафти ҷомеа қафо мемонад. Дар ин сурат ӯ наметавонад, ки барои хонандагон намунаи ибрат бошад ва дуруст таълим дода битавонаду онҳоро ҳамқадами замон бигардонад. Барои ин, пеш аз ҳама омӯзиши забонҳои русиву англисӣ бисёр муҳим арзёбӣ мешавад, ки, мутаассифона, натиҷаҳо дар ин масъала чандон қонеъкунанда нестанд.
Гулбаҳор НАСРИДДИНОВА, директори муассисаи таҳсилоти миёнаи умумии № 101, ноҳияи Сино
Баёни ақида (0) Санаи нашр: 12.02.2019 №: 32 Мутолиа карданд: 1188