иқтисод
ОБ. ДАР ПАЙРАВӢ АЗ ПЕШВОИ МИЛЛАТ ТАШАББУСКОР БОШЕМ!
Яке аз унсурҳои муҳимтарин ва бебаҳотарини табиат об мебошад. Маҳз тавассути об хоки ташналаб сероб мегардаду заминро сабзу хуррам ва кулли мавҷудотро аз он баҳраёб мегардонад. Вақте аз хоб бедор мешавем, ниёзи аввалини мо ба ин неъмати бебаҳои табиат - об аст. Нӯшидану шустан, обёрӣ намудани сабзавоту меваҷот ҳама ба об вобаста аст. Дар баробари кишоварзӣ саноат ҳам ба об эҳтиёҷи калон дорад. Даҳсолаи байналмилалии амал «Об барои рушди устувор, солҳои 2018 – 2028», ки маҳз бо ташаббуси Тоҷикистон, иқдоми инсондӯстонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ гардид, нуфузу эътибори Ватани азизамонро дар ҷаҳон хеле боло бурд.
Гарчанде кишвари хуррамзамини мо захираи зиёди обҳои ошомиданию шифобахш дорад, пешниҳод намудани ҳалли масоили глобалии ҷаҳон, аз ҷумла норасоии об, бо иқдоми Пешвои миллат аҳамияти умумибашарӣ дошта, ба манфиати тамоми халқҳои сайёра аст.
Таваҷҷуҳи Пешвои миллат ба ин мушкили зиндагии аксари мардуми ҷаҳон аз сиришти бузурги башарпарварӣ шаҳодат медиҳад. Ба қавли устод Мирзо Турсунзода:
Шодам, аммо мехӯрам ғамҳои халқи дигаре...
Иқдомҳои наҷиби Пешвои муаззаму башарпарвари тоҷик дар арсаи байналмилалӣ мактаби ибратомӯз барои ҷаҳониён буда, амалисозии онҳо ободию хуррамӣ ва солимии сайёраро таъмин менамояд. Ҳифзу истифодаи самараноки захираҳои об барои расидан ба Ҳадафҳои Рушди Ҳазорсолаи Созмони Милали Муттаҳид аҳамияти хосса пайдо намуда, барои бартарф намудани сатҳи камбизоатӣ ва аз байн бурдани ҳолатҳои осебпазирии саломатии инсон вобаста ба мушкилоти норасоии об мусоидат менамояд. Алҳол 2,5 миллиард сокини сайёра ба шароити дурусти санитарии оби ошомиданӣ дастрасӣ надорад. Аз нигоҳи мутахассисон, тақрибан 1,2 миллиард аҳолии ҷаҳонро хушксолӣ ва бо ин сабаб, сар задани бемориҳои гуногун таҳдид мекунад.
Воқеан, ҷое, ки об аст, ободонию шукуфоист. Зиндагӣ дар кишвари биҳиштосои мо, ки дар дунё ҳамчун сарзамини сарсабзу шодоб, дорои табиати камназиру захираҳои фаровони оби ошомидании ширину мусаффо эътироф шудааст, ҳар инсони боақлро ба сипосу шукргузорӣ водор менамояд. Мутаассифона, ҳамарӯза мушоҳида мекунем, ки дар бисёр хонаю кӯчаҳо об аз ҷумакҳо ҷорӣ мешавад, вале касеро аз ин парво нест. Моро зарур аст, ки ба қадри ин ганҷи бебаҳои зиндагӣ бирасем ва шогирдонро дар рӯҳияи самаранок истифода бурдани об - ин сарвати бебаҳои табиат тарбия намоем. Дар ҳама ҳолат обро сарфакоронаю оқилона истифода бурдан қарзи инсониву ватандории мо маҳсуб меёбад.
Лайлӣ ШАРИФОВА, мудири шуъбаи илм, инноватсия ва робитаҳои байналмилалии
коллеҷи кӯҳии ба номи С. Юсуфова
Баёни ақида (0) Санаи нашр: 18.02.2019 №: 36 Мутолиа карданд: 1010
