иқтисод
ДЕВАШТИЧ ДАР МАСИРИ БУНЁДКОРӢ
Имрӯзҳо дар партави дастуру нишондодҳои Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ифтихори Ҷашни 30 - солагии Истиқлолияти давлатӣ дар ноҳияи Деваштич бо фарогирии ҳамаи деҳаю маҳалҳои аҳолинишин бунёди 309 иншооти маъмурӣ, иҷтимоӣ, муассисаҳои таълимӣ, тандурустию фарҳангӣ ва корхонаҳои истеҳсолӣ ба нақша гирифта шуда, корҳо дар ин самт шурӯъ гардиданд.
Қобили зикр аст, ки дар ҳар деҳа бунёди сартарошхона, нуқтаҳои хатнаи кӯдакон, кошонаи ҳусн ва ҳаммом, инчунин, таъмири биною иншоот, тоза намудани кӯчаю хиёбонҳо, гирду атрофи идораҳои маъмурию манзилҳои истиқоматӣ, обод намудани гулгашту мавзеъҳои истироҳатӣ ва саёҳатбоб, ташкилу ҷойгиркунии партовгоҳҳо зери назорати қатъӣ гирифта шудааст.
Соли сипаришуда иҷроиши 29 банди нақшаи мазкур пурра иҷро гардид. Ҳоло дар Ҷамоати шаҳраки Ғончӣ сохтмони 45 иншоот ба нақша гирифта шуда, айни ҳол дар 25 иншоот, аз ҷумла таваллудхонаи марказӣ, биноҳои маъмурии нозироти андоз, раёсати молия, маркази адлия ва дигар нуқтаҳои маишиву хизматрасонӣ корҳои сохтмонӣ идома доранд. Инчунин, беш аз 5 километр роҳе ки ноҳияро ба шоҳроҳи Душанбе - Чанак мепайвандад, мумфарш шуд. Дар маҷмӯъ, дар ҷамоати шаҳрак аз даҳ банди иҷроишаш дар соли 2018 пешбинишуда иҷроиши 8 банд таъмин гардид.
Дар Ҷамоати деҳоти Ғазантарак бошад, аз 33 иншооти нақшавӣ дар 11-тои он корҳои сохтмонӣ ҷараён дорад. Соли гузашта ба ҷойи як иншооти нақшавӣ 5 иншоот ба истифода дода шуд. Дар ин ҷо, бо ташаббуси мардум сохтмони майдони варзиш ба роҳ монда шудааст. Соҳибкори деҳаи Зарнисори ҷамоат Тӯйчӣ Абдуллоев муассисаи таҳсилоти миёнаи умумии № 13 ба номи профессор Исматулло Юлдошевро, ки соли 1983 бунёд ёфтааст, бо маблағи наздик ба 300 ҳазор сомонӣ таъмир намуд. Аз ҳисоби кумитаи волидон ва сарпарастони деҳа дар саҳни мактаб ҳавзи шиноварӣ сохта шуда, роҳравҳо ба масоҳати 124 метри мураббаъ сафолакпӯш, дарвозаи мактаб нав, гирди мактаб панҷарапӯш ва бино пурра таъмиру рангубор шуданд. Ҷараёни корҳои ободонӣ дар дигар ҷамоатҳои ноҳия низ дар сатҳи баланд идома дорад.
Ба ифтихори оғоз ёфтани Даҳсолаи байналмилалии амал «Об барои рушди устувор, солҳои 2018 - 2028» бо дастгирии Ҳукумати мамлакат сохтмони хати оби Даҳкатсой - Даҳанасой, ки барои рушди иқтисодии ноҳия аҳамияти бесобиқа дорад, оғоз гардид. Обанбори Даҳанасой дар атрофи деҳаҳои Зарнисор, Зароб, Панҷбоғ, Ҳазорчашма ва Меҳробод ҷойгир шуда, он солҳои 70 - уми асри ХХ бунёд гашта буд ва ҳаҷми ғунҷоишаш 42 миллион метри мукааб аст. Дарозии хати оби Даҳкатсой – Даҳанасой мувофиқи лоиҳа 33,4 километр буда, дар масофаи 31 километр об бе истифодаи неруи барқ ҷорӣ мешавад. Арзиши лоиҳаи мазкур 64 миллион сомониро ташкил медиҳад.
Эҳсоси масъулият, талошу кӯшишҳо баҳри суръат бахшидан ба фаъолият дар ин самт низ дучанд мегардад. Аз ин рӯ, бовар дорем, мардуми ноҳия чун дигар сокинони шарафманди Тоҷикистони азиз барои боз ҳам ободу зебо гардондани сарзамини худ аз тамоми имкониятҳо истифода намуда, Ҷашни 30 - солагии Истиқлолияти давлатии Ҷумҳурии Тоҷикистонро бо дастовезҳои арзанда, шукӯҳу шаҳомат ва файзу баракати хосса таҷлил менамоянд.
Пардабой КЕНҶАЕВ, сармеъмори шуъбаи меъморӣ ва шаҳрсозии
мақомоти иҷроияи маҳаллии ҳокимияти давлатии ноҳияи Деваштич
Маратҷон ҶАББОРОВ, корманди бахши кор бо ҷавонон ва
варзиши ноҳия
Баёни ақида (0) Санаи нашр: 21.02.2019 №: 39 Мутолиа карданд: 1049
