фарҳанг
АМНИЯТИ ИТТИЛООТӢ ВА РУШДИ ДАВЛАТДОРИИ МИЛЛӢ
Дар Маркази тадқиқоти стратегии назди Президенти Ҷумҳурии Тоҷикистон бо иштироки намояндагони вазорату кумитаҳо ва муассисаҳои марбутаи давлатӣ, марказу пажӯҳишгоҳҳои илмию тадқиқотӣ, донишмандону коршиносон ва кормандони васоити ахбори омма мизи мудаввар дар мавзӯи «Вазъи корҳои маърифатӣ (сиёсию идеологӣ) дар Ҷумҳурии Тоҷикистон: мушкилот ва дурнамо» баргузор гардид.
Парвиз Муҳаммадзода, муовини директори Маркази тадқиқоти стратегии назди Президенти Ҷумҳурии Тоҷикистон, зимни ифтитоҳи ҳамоиш тақвияти вазъи корҳои маърифатӣ ва сиёсиву идеологиро дар таъмини сулҳу суботи мамлакат ва рушди давлатдории миллӣ муҳим арзёбӣ кард.
Масрур Абдуллозода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, иброз дошт, ки Тоҷикистон ҳамчун як давлати миллӣ аз консепсияи миллати огоҳ пайравӣ намуда, маърифати сиёсӣ ва ҳушёрии сиёсии мардуми худро ба сатҳи зарурӣ баровард. Зикр шуд, ки корҳои сиёсӣ ё маърифатӣ дар шароити имрӯза бештар тавассути тарғиботу таблиғот аз тарафи васоити ахбори омма амалӣ мешаванд. Солҳои охир ҳамагон шоҳиди он буданд, ки баъзе доираҳои байналмилалӣ фақат ба василаи бозӣ бо иттилоот ва бо истифода аз ноогоҳии мардум вазъи баъзе кишварҳоро ба чи ҳол оварданд. Ҷавонони ин кишварҳо ба фиреби иттилоотӣ гирифтор шуда, бузургтарин дастовардҳои худро бохтанд ва акнун барои аз ин тӯфони ноамнӣ берун омадан боз даҳсолаҳои дигар зарур аст. Аз ин рӯ, таъмини амнияти иттилоотӣ имрӯз ба масъалаи муҳими давлатдорӣ табдил шуда, суботу устувории ҳукуматҳо ва амнияти миллии давлатҳо ба он вобастагии зич пайдо кардааст. Зеро технологияи муосири ададӣ ва иттилоотӣ имконият медиҳад, ки афкори мардум ба шакли дилхоҳ ташаккул ва ба тарафи дилхоҳ майл дода шавад. Имрӯз иттилоот дар тамоми соҳаҳо нақши калидӣ пайдо карда, ҳамчун воситаи муҳими таъсиргузории сиёсӣ барои давлатҳо нақши сарнавиштсоз дорад. Дар чунин марҳала нақши воситаҳои иттилоотӣ – телевизион, радио, матбуот, фазои интернетӣ хеле зиёд гардида, таъсири онҳо ба аҳли ҷомеа бештар эҳсос мешавад. Дар ин замина, махсусан ташаккул додани ҷаҳонбинӣ ва шуури миллии ҷавонон аҳамияти хосса касб менамояд.
- Ҳифзи давлатдории миллӣ ва тамомияти суботу амнияти он вазифаи асосӣ буда, тамоми он пешниҳодҳое, ки ироа мешаванд, маҳз дар атрофи ҳамин ҳадафи меҳварӣ маъно пайдо мекунанд, - гуфт М. Абдуллозода.
Иштирокдорони ҳамоиш оид ба нақш ва ҷойгоҳи корҳои маърифатӣ (сиёсиву идеологӣ) дар низоми муосири давлатдорӣ миёни ҷавонон, аҳамияти корҳои маърифатӣ дар муҳити деҳот ва фазои динии кишвар, инчунин, нақши ВАО - и электронӣ, чопӣ ва шабакаҳои иҷтимоӣ дар низоми корҳои маърифатӣ баромад карданд.
Мунаввари САФАР,
«Ҷумҳурият»
Баёни ақида (0) Санаи нашр: 28.02.2019 №: 44 Мутолиа карданд: 955
