маориф
ҲАДАФ ПЕШРАФТИ СОҲА
Пешвои муаззами миллат муҳтарам Эмомалӣ Раҳмон дар Паёми навбатиашон ба Маҷлиси Олии Ҷумҳурии Тоҷикистон чунин таъкид доштанд: “Дар соҳаи маориф ду проблемаи асосии ҳалталаб вуҷуд дорад. Якум, норасоии кадрҳои соҳибкасби омӯзгорӣ ва дуюм, баланд бардоштани сатҳу сифати таълим дар тамоми муассисаҳои таҳсилотии кишвар. Агар омӯзгор сатҳи баланди касбият надошта бошад, мо ҳеҷ гоҳ ва бо ягон восита сифати таълиму тарбияро беҳтар карда наметавонем”.
Дар ҳақиқат, имрӯз рафти таълиму тарбия масъалаи муҳими соҳаи маориф шудааст. Ман ин мушкилро дар мисоли омӯзгорони ноҳияи Муъминобод шарҳ доданӣ ҳастам.
Ҳамасола аз макотиби олии кишвар 100 - 115 омӯзгори ҷавон бо роҳхат ба зодгоҳашон ба кор меоянд. Аммо аксари онҳо на танҳо чи гуна ариза навиштанро намедонанд, балки дар навишт онҳо ба хатоҳои зиёди имлоӣ роҳ медиҳанд. Аз ин сабаб, вақти он аст, ки мутахассисони ҷавонро “роҳхат дорад” гуфта аз як сар ба кор қабул накунем, балки ин корро тариқи озмун ба роҳ монем.
Дуюм, ба омӯзгорон аз рӯи нишондоди хуби шогирдони болаёқати омодакардаашон, намунавӣ будани ахлоқи онҳо иловапулиҳои ҳавасмандгардонӣ пардохт кардан зарур аст. Дар ин сурат, сатҳи худомӯзии мутахассисони ҷавон беҳтар мегардад. Зуд - зуд дарсҳои кушоди мутахассисони болаёқатро ташкил кардан аз манфиат холӣ нест.
Ба мушоҳида мерасад, ки баъзе омӯзгорон таълиму тарбияи дурусту кофӣ намедиҳанд. Соатҳои дарсиро бо суҳбатҳои беҳуда, истифодаи ноҷои телефон мегузаронанд. Аз ин сабаб, дар ҳамкорӣ бо волидон бояд нисбат ба чунин омӯзгорон чора андешида шавад. Зикр кардан бамаврид аст, ки алоқаи мактаб бо волидон ва волидон бо таълимгоҳҳо хеле заиф гаштааст. Маҷлисҳои синфию мактабӣ бо иштироки волидон рӯякӣ мегузаранд.
Аз рӯи низомномаи муассисаҳои таълимӣ ва талаботи соҳа бояд назорати дохилимактабӣ ягон соат аз мадди назари роҳбари таълимгоҳ дур набошад. Аммо дар мо баръакс мебошад. Роҳбар ҳамеша дар маркази ноҳия ё ҷамоат аст. 10 – 15 километр дуртар аз таълимгоҳ барои иштирок дар ин ё он чорабинӣ меравад. Ба андешаи мо, бояд ҷонишинҳои директор дар чунин чорабиниҳо ширкат варзанд.
Ин пешниҳодҳои мо камбудиҷӯиву нуқскобӣ нест, балки барои рафъи ҳалли мушкилот аст.
Нурулло ҲАСАНОВ, ноҳияи Муъминобод
Баёни ақида (0) Санаи нашр: 28.02.2019 №: 44 Мутолиа карданд: 1325
